有鋼門迪基亞把關，曼聯爭霸路上少一份擔心之餘，亦掩飾到「魔獸」盧卡古低沉嘅狀態。沒有迪基亞，曼聯相信擋不住阿仙奴的瘋狂反撲，難以贏波而回；今晚幸好只係主場應付意義唔大嘅歐聯分組賽尾輪，正好輪換主力，留待禮拜日嘅曼市打吡大搏殺。嚟緊主攻拉近跟曼城距離，似乎係曼聯唯一選擇，但搶分重將盧卡古，場上戮力有餘，公開得到摩帥力撐，但自10月中鬥利物浦計起，魔獸上陣12場球會比賽只得1個入球，經歷一個小低潮。相反曼城全民皆鋒，紅魔要後上爭霸，呢點幾吃虧。
早在5、6年前，摩佬喺車仔教波時，曾公開批評年少嘅盧卡古冇鬥心，承受唔到壓力，不合踢大會，所以任由他外借；依家盧卡古大個仔，24歲踏入全熟，喺曼聯理應大放異彩。問題係，摩帥嘅單箭頭戰略，對9號位球員要求極大，幾乎係「一腳踢」，上季伊巴謙莫域季初場場用，連歐霸都要出場搏盡，用到殘，最後捱唔到季尾，幾乎傷到收山。如今魔獸陷入低潮，喺時候俾伊巴多啲上場，磨利把刀。