代替鋼門迪基亞，把守紅魔最後一關，注定奧拿拿要走一條不平凡嘅路；門將係全隊最「搶眼」嘅位置，英雄定戰犯，有時一場波就定命運，尤其大會球迷記一世。奧拿拿攞住國米個歐聯亞軍獎牌，上季加盟曼聯，一直係箭靶，撐佢腰嘅「坦克」已走人，但紅魔國內戰績全無起色；佢面前嗰幾位中堅，似走馬看花，根本冇做好第一道屏障，只係間中牛油手嘅奧拿拿，往往成為外界嘅「戰犯」。其實計英超撲救次數，奧拿拿排第7，腳下功夫唔差又係賣點；話佢係史上最差嘅紅魔門將，但球會現時咪又係企喺史上最差嘅位置，弱隊出龍門，唔應該適合形容重建中嘅曼聯，佢亦冇必要孭晒「全鑊」。
奧拿拿禮拜四晚歐霸會唔會重返正選，備受關注，呢場紅魔季內最重要嘅大戰，佢打得好可即變返球迷英雄；再有牛油手，只怕好似2018年歐聯決賽，利記門將卡拉奧斯一手斷送冠軍俾皇馬，之後一沉不起。歐聯亞軍獎牌個CV變負累，淪為人球，年初自由身加盟德乙史浩克04做後備，睇怕夏天又要搬家。