歐洲五大聯賽，除咗英超之外，爭霸形勢通常一面倒，好似法甲巴黎聖日耳門、意甲祖雲達斯同西甲巴塞隆拿，今屆聯賽順利冧莊之餘，仲拋離最接近對手起碼10分以上；上半季大讓賽嘅德甲班霸拜仁慕尼黑，最終亦圓七連霸夢，難度唔高。列強心雄，總寄望歐聯爭佳績揾大錢，但遇上英超球隊今屆玩晒歐洲兩大盃賽，尤其係巴塞竟然作客吞利物浦4蛋出局，嗰種不安，令佢哋迅速求變圖強，真係要「多得」英超。
英超除咗曼市雙雄之外，另外4強未得閒組軍。聖日耳門王牌球星尼馬失控打球迷後，跟備受挖角嘅法國之寶基利安麥巴比，來屆未必同隊。意甲祖雲達斯聯賽八連霸，即炒功勳教練艾歷尼，拜仁同巴塞各自仲有場國內盃賽決賽未踢，教練前途命懸一線。歐聯三連霸後斷纜嘅皇馬，再掌帥印嘅球王施丹想大換血，先向就快30歲嘅加里夫巴利開刀；但呢位威爾斯人年薪1,500萬英鎊，佢想學廿年前効力皇馬嘅英國前輩麥馬拿文咁，賴死唔走，睇怕光頭施丹都會幾頭痕。