梅迪薩卡考慮掛靴

英傳媒報道，阿仙奴中堅梅迪薩卡考慮掛靴。呢位前德國國腳近年受傷患困擾，早前喺足總盃決賽擊敗車路士，係佢今季首次正選上陣。不過，今仗若非哥斯尼、加比爾包列斯達及梅斯達菲因傷病或停賽缺陣，佢未必有上陣機會。梅迪薩卡透露，佢嘅足球生涯非常幸運，希望可以從高峰退下，足總盃冠軍正好作為掛靴嘅離別禮物。個人認為，32歲嘅梅迪薩卡唔使咁快掛靴，雖則近年傷多過踢，但睇佢喺足總盃嘅表現仲有貨賣，而且年紀唔算好大，咁早掛靴比較可惜。英超節奏快，如果佢考慮轉戰較低組別聯賽，確保有上陣機會，其實仲實際。