本月歐洲球壇視線轉到國際賽，先聚焦久休嘅烏克蘭，要作客連過蘇格蘭同威爾斯，趕上世盃決賽周歐洲尾班車。連教練柏查高夫都請纓想開上真正戰場，保衛國家，冇人會懷疑呢支「藍黃大軍」嘅強大戰意，最擔心部分本土國腳缺陣半年，狀態不明；而且明晚「頭關」作客蘇格蘭，難度又會比陣容有點老化嘅另一英國球隊威爾斯更難應付。個人認為呢場波唔係純感情分撐烏軍，首先其實該隊一半主力，係外流西歐出名球會搵食，包括耶莫蘭高(圖)、辛真高等英超兵，質素有返咁上下；而本土嗰班，一早已集訓並跟德甲慕遜加柏友賽贏波，蓄銳而臨，兩班人近年夾慣，唔會生疏。「藍黃大軍」已連續3屆踢歐國盃決賽周，計大賽經驗勝蘇格蘭；反而今場主隊部分骨幹，喺今季球會踢得好沉，淨係正箭頭查阿當斯喺修咸頓季尾成3個月冇入波，夠令「格仔」球迷擔心。今場蘇格蘭會主攻，一場過大賽興縮後博突擊爆冷；烏克蘭鋒力有把握，忍得到好似皇馬咁，唔係冇機會先過一關。