麥克盧保04年出道，一直效力韋斯咸18年，於今季後掛靴，剛戰曼城告別主場球迷。
我睇住麥克盧保大。05年喺英國睇波，走入「槌仔幫」舊主場烏普頓公園，已見十幾歲嘅佢，喺英冠擔正；後面有門將伊恩獲加、中堅有安東費迪南、中場有李奧曲卡、前面有大名鼎鼎嘅舒寧咸。喺一班英格蘭同鄉大佬面前，呢位滿場飛嘅小夥子幾搶眼；呢十幾年佢喺槌仔幫，位置同比賽風格冇大變，出勤多入波少，套用賽馬術語：忠心準繩。英超咁激，打防中頂到35歲，就算「槌仔幫」期間一個重要錦標都未攞過，呢位Mr West Ham瀟灑告退，更值尊重。可惜佢嘅接班人迪格蘭懷斯，現今好值錢，可見未來難強留；班波仲可唔可以保持咁強嘅競爭力，要考領隊莫耶斯。
盧保唯一告別留憾，係韋斯咸不入歐霸決賽。隊波今屆聯賽共4對曼城、利物浦，1勝1和2負，兩場敗仗都係僅輸一球；但今屆歐霸4強輸俾德甲中下游嘅法蘭克福，而法福明晚歐霸決賽對手係蘇超班霸格拉斯流浪。究竟係英超內耗太勁、水準低咗定係唔志在非歐聯嘅盃賽？姑勿論原因，結果係呢個歐霸決賽組合好難估得到。