歐聯16強首回合，英超四路興兵竟然有三軍吞蛋覆師，呢個周中熱刺同利物浦會喺次回合先登場，進行反擊戰。歐聯要翻盤，睇番近3季16強賽總計有8場波，無論作客或主場一方先輸，都有本事喺次回合反勝晉身8強，成功率唔細，當然決心加上主攻能力係最大本錢。上屆祖記嘅C朗入3球「反吸」馬體會，同大前季有美斯嘅巴塞主場大勝巴黎聖日耳門六個一皮，令人回味。熱刺鬧緊前鋒荒，聯賽都顧唔掂就難啲；反而衛冕嘅紅軍利物浦明鬥馬體會，前線三叉戟威力強，封王英超又只係時間問題，加埋國內盃賽悉數玩完，呢刻目標非常清晰。馬體會今場一定死守博突擊攞作客入球，紅軍唯一出路係速戰速決，一開波即狂攻亂對手陣腳。
疫情陰霾下，足球比賽都係望天打卦，歐聯已開始要閉門作賽；幸好曼城剛戰打吡「自殺」，造就紅軍歷史性英超封王嘅大日子更近，今場歐聯仲有幾萬紅迷賽前大唱「You ‘ ll Never Walk Alone」助威，要好好珍惜，因為晉級去下一圈，晏菲路都可能靜英英。