年多前，有個連英甲都踢唔掂嘅球員叫丹尼爾占士，啱啱一球成名成為話題，難怪「紅龍」威爾斯國家隊近年人氣長旺。國家隊現時無謂波太多，多數比賽面目模糊，但威爾斯近年出場，總有留住球迷眼球嘅驚喜。佢哋近年有個優勢，就係主帥都肯大膽重用新人，擅於營造士氣高昂嘅團隊，盡力擺脫佢哋係由加里夫巴利同艾朗藍斯組成嘅二人球隊形象。
「紅龍」喺2016年歐國盃入4強，之後世盃外爆出利物浦前鋒活特本，可惜年輕人喺大會出頭難，但佢早前一場國際賽都有波入。啱啱歐國外初登場，「紅龍」氣走斯洛伐克，又出了位喺英格蘭出世、因阿爸關係而選擇效力威爾斯嘅矮腳虎丹尼爾占士，射入世界波奠勝。呢位身高得1.7米嘅翼鋒，季初先喺英冠史雲斯坐正選，冬季轉會窗原本準備以1,000萬英鎊過檔英冠前列嘅列斯聯，臨門至撻Q，睇怕今夏輪到英超球隊挖角。巴利勢離皇馬尋新生，藍斯就落實今夏轉會祖雲達斯，同球王C朗合作，兩大主力有新出路，加上國家隊新星輩出，主帥傑斯成手王牌，歐國外領軍出線難唔到佢。