全球今夏異常高溫，英國亦身受其苦，又熱又乾，雨都唔多滴；草場乾硬多沙易令球員扭傷足踝，嚴重嘅甚至會斷腳，小球會季前備戰受影響。當然，新一屆又係鬥燒錢嘅英超就冇有怕。旱夏令到非聯賽球會凱特靈鎮(Kettering Town)為咗令球場草綠、保住球員對腳，要灌3萬公升嘅水入草地；英乙林肯城為安全計。要取消部分友賽；英超錢多場地管理唔使擔心，但倫敦天氣依家仲日日攝氏30度，比平均氣溫多出六、七度，英超快上快落，球星季初波末段冇氣抽筋就幾尷尬下。
英超乜水都唔缺，今屆轉會市場又要提早關閉，大小球會交易都爽快得多，好似水晶宮，簽到轉自由身後成個月都冇人要嘅德國「新星」麥斯美亞，要17萬英鎊周薪。3支今屆升班馬已花1.3億鎊擴軍，單計富咸用咗5,800萬鎊，花費已遠遠超過意、西同法甲全部升班馬嘅總和。始終英超中、下游球隊唔怕豪花，至怕降班；啱啱降嗰3隊，首輪英冠只錄1勝2負，跌落呢個無盡嘅深淵，同喺沙地踢波，一樣咁難受。