藍月玩「沙」小心出事
失意嘅時候，出去抖下氣係好事，正經歷近年最低潮嘅曼城，喺英超年尾快車期可以請假，去日間超過攝氏30度嘅沙特度下假，曬下太陽；打2場似乎「easy win」嘅比賽，博個球會史上首個世冠盃返歸，對一班主力球員嚟講，成件事好似幾refresh。
曼城上仗鬥水晶宮，造出英超十多年以來，首次場上除門將外，10個球員都起碼製造到一個入球機會，踢法真係超班；不過數據再亮麗，最終都係睇比數，佢哋近6場英超只能反勝盧頓錄得1勝，反映鬥心同踢法有啲問題，而且喺濕凍嘅場地下，簡單就是美，但佢哋偏偏呢刻冇咗有傷嘅快翼杜古同神鋒夏蘭特。哥帥藝高膽大，季前高價放走幾位有潛質嘅土炮，包括去咗車仔嘅爆紅攻中高爾彭馬；現在又話唔要三獅國腳中場加雲菲臘斯，進一步靠晒今屆已攞2紅牌，累球隊喺期間3場英超全敗嘅防中洛迪卡斯簡迪。又睇吓哥帥喺冬窗搵啲乜嘢中場好貨色替補、又睇吓佢哋喺中東返嚟，即要喺不足4天內兩戰英超，會唔會玩「沙」玩出事，成今屆英超爭標路嘅一大關鍵。