賽季報銷唔係末日
球員天敵之一，可能係傷十字韌帶。球員角度，踢得密易傷係必然，但喺球隊角度，有時亦避無可避，波士總想夫添踢好每場比賽。冇乜邊隊可以做到車路士咁，A隊11人踢英超、B隊另外11人踢歐協聯，但如果係踢歐聯，玩法唔會咁大膽。
睇返上季十字韌帶重創嘅名將，多數休大半年至一年不等，但唔代表係球會嘅世界末日。包括大名鼎鼎嘅尼馬、泰拔高圖爾斯、艾達米列圖、新星韋斯利科芬拿、祖利安添巴及加維等等；尼馬同加維未見影外，其他季初復出都算健康、密密踢，戰力依然。尼馬嘅希拉爾，高圖爾斯、艾達米列圖嘅皇馬，上屆一樣攞到聯賽冠軍。賽事咁密，輪換同適時用新人撐場，避免主力過勞增加連環出事機會，係呢場長途賽嘅致勝關鍵。呢方面曼城嘅哥帥近年做得最好，所以冇咗洛迪卡斯簡迪，另一防中高華錫剛喺英超史上首次入2球。睇返兼踢歐聯嘅維拉同阿仙奴，啱啱一重用後備兵，質素同狀態，跟主力陣容有一定距離；唔想兩頭唔到岸，要靠艾馬利同阿迪達往後用人眼光同部署。