拜仁最強生還者
新賽制下嘅歐聯16強，牌面跟改制前冇太大分別，5大聯賽球隊，喺16強賽全部有「先客後主」優惠；而主場一方即淘汰圈生還者，喺今屆新制已多踢4場硬仗，牌面蝕底，究竟佢哋終極嘅命運係點，會係新制下有趣嘅焦點。
賽事極密，多踢4場歐聯，冇咗歇冬回氣，令到「生還8強」只有PSG同拜仁仲喺法、德甲放領；其餘賓菲加同皇馬仲可以接近榜首，睇到新制下兼顧國內聯賽爭霸，個底要更厚。好似一早喺國內盃賽出埋局嘅多蒙特同飛燕諾，聯賽已被遠遠放甩，如果呢round收工，下屆好大有機會冇份再玩歐聯。聯賽對抗性較弱，無疑有助列強喺歐聯走得更遠，PSG季初、季中兩個樣，國內無敵兼爭緊三冠王，近排主場專炒對手；今圈抽中對賽程極密嘅英超一哥利記，其實有得鬥。至於最古惑可能係拜仁，早前聯賽榜首戰作客利華同歐聯主場鬥些路迪，hea踢差到唔似真；德甲賽程疏，佢哋德盃又一早出局，挾住近5屆歐聯1冠1次4強同3次入8強佳績，咁啱又對利華，等睇冇冠射手卡尼發威！