自從俄國大亨阿巴莫域治2003年入主，車路士領隊人來人往，以現任波士、球會名宿林柏特教波資歷最淺，但季初叫好叫座。不過，車仔踏入今年走晒樣，同以往教足全季嘅主帥比較，佢係阿巴麾下暫時得勝率最低嘅波士，跌穿50%，兼且近期隊內有啲部署唔係好對勁。林伯季初冇得買人，重用回朝攻中美臣蒙特等一眾年輕人，表現冇壓力卻有驚喜；但半季下來，一班新人保持唔到又有傷患，只見林伯開始焦急了。唔妥首席門將阿列沙巴拿加，又加埋頂級防中尼高路簡迪養傷，佢喺雪櫃攞番馬高斯阿朗素、基奧特同柏度洛迪古斯出嚟；可以買人，早響阿積士中場派牌嘅薜耶治下季加盟，但激發唔到「契仔」美臣蒙特振作。
林伯前中後都搞唔掂，歐聯處出局邊緣兼今晚要喺英足總盃鬥戰意難測嘅利物浦，真係戥林柏份工牙煙。車仔嘅黑氣，似乎禍及又賺一大筆嘅阿積士；件事揚咗後，阿積士歐霸出局，荷甲近5場輸3場，榜首優勢盡失。車仔首要係揾中鋒唔係揾攻中，呢樁交易早響，究竟邊個係最大得益者？