車仔正重演歷史
雖然今夏接手車仔嘅哥帥高足馬利斯卡出口術，話列強唔會好似該隊翼衛古古列拿咁樣「跣低」失波，自己隊波亦未準備好爭標；實情最強係大軍陣容主次分明，主力少傷，對上一次封王英超，正係16/17球季，初教藍戰士嘅另一意大利人干地經手，藍軍嘅美國老闆咁急進，點會係馬利斯卡嘅真心話。
車路士暫時仲係爭標第4熱門，外界可能覺得隊波大賽經驗唔夠；但佢哋最大優勢係要踢歐協聯，俾非主力出場當安撫又可練兵，補充「一隊」兵源，主力受大傷機會減少。以星將高爾彭馬為例，今屆歐協聯分組賽4戰未出過場，反而頭15場英超全列正選。紅軍沙拿同藍月夏蘭特兩大射手，暫時已額外多踢超過400分鐘歐聯，長期雙線作戰耗力巨易傷。車仔對上一次封王英超，正係當屆無緣歐戰，由攻中「夏神」夏薩特領軍，「野獸」迪亞高哥斯達喺前線衝鋒，踢法簡單實際。球隊嚟緊周中歐協聯要去嚴寒嘅哈薩克作客，高爾彭馬又可安坐家中嘆暖氣為隊友打氣，等住備戰下場倫敦打吡鬥賓福特，車仔已3波轉4波，會越追越貼紅軍。