今年最後一個國際賽期，今晚後平淡完結。歐洲強隊安全網大，免於歐國外出局，球王C朗遇弱爭入波、美斯喺沙特友賽捧盃及國足輸波，都欠話題性。年尾視線，將重返頂級球會賽事，英國波本月下旬起進入瘋狂賽程。英超榜首利物浦除咗踢聯賽之外，還要兼歐聯、英聯盃、世冠盃；由本周六起至年底，紅軍平均3日多啲就踢1場，利迷睇足都要好有毅力，主力球員嘅健康受到巨大考驗，亦好考驗領隊高洛普嘅調陣能力。踢得咁密，大球會都未必能連戰連勝；倒想留意下，名字曾喺英超曾響亮一時，擁有佐卡夫、奧高查及迪奧夫等世界級名將嘅保頓，有幾大能耐保住英甲條命。
因財政問題今季負12分起步，季初唔使清盤即由新帥狂簽失意軍人迎難再上；由季初場場吞幾蛋，去到國際賽期間錄得聯賽3連勝，終於有1分喺手，雜牌軍鬥心不爛。英甲降3隊，佢哋依家距尾四嗰隊有12分但打少3場；如果紅軍今季最終能歷史性首捧英超，保頓護級成功亦將話題性十足。