高柏尼教卡尼
近年跟過哥帥嘅都馨香，連教到般尼降班嘅前曼城隊長高柏尼，都引到德國班霸拜仁重金撬呢位比利時大將過檔，要阻止利華古遜來屆冧莊，就真係令人意外。跟過哥帥嘅人唔少，最紅嘅阿迪達都係連續兩屆幫阿仙奴攞英超亞軍；哥帥另一前助教馬利斯卡，複製高柏尼成就，教李城一季即可重返來屆英超，仲有幾多斤兩，來屆即知。但計升呢之快，冇一位「徒弟」及得上前曼城隊長高柏尼；佢喺比甲打個白鴿轉，返英國球壇即領般尼以無敵姿態升返英超，踢法扮大球會崇尚地面進攻，結果全季攞得24分，計近5季共15支排名尾3支英超隊，般尼分數總排名列尾6，咁都吸引到拜仁一眾高層嘅「慧眼」，唔通真係以前幫拜仁攞過聯賽3連霸嘅哥帥品牌效應？始終般尼係細球會，高柏尼仲可以大權在握，去季用咗成億鎊買人，但冇一球員突出可以增值；想到中堅出身嘅高柏尼，要喺拜仁教新鮮出爐歐洲金靴獎得主哈利卡尼(今屆聯賽入36球，僅比般尼全隊少5球)射波，大家或會尷尬。