第二場演唱會邀得林家謙任嘉賓。(發稿)
張敬軒演唱會昨晚進入第二場，大會刻意晚上九點半才開騷，並跟觀眾一起倒數迎聖誕， 軒仔更送上聖誕大禮安歌二次，揚言要當尾場做。
演唱會上，軒仔不單換上搶包山款式熊仔聖誕樹新衫出場大唱洗腦聖誕歌，更請來樂壇新寵林家謙任嘉賓。家謙出場，先是與軒仔合唱《追風箏的孩子》，繼而再跟觀眾打招呼，軒仔隨即叫家謙 : 「你除耳機聽下大家比你o既核爆式歡呼聲.....」軒仔形容家謙係一個好特別的人：「佢好得意，我咁多年開音樂會、 開演唱會，未見過有一位嘉賓咁唔話得 ，我地將綵排錄音send 比佢，佢竟然唱番一個編埋和音版比我 ！」家謙就話:「咁樣做係希望成為呢個演唱會獨有版本，希望大家喜歡呢個版本，每次不同先好玩 。」
軒仔又表示最初認識家謙是在商台，當時大家同電梯，有身邊朋友指他們兩人好似樣，當時不以為意，但今次於舞台上面對面合唱真的有照鏡感覺。他直言，家謙這兩年有好成績，非常戥對方開心，唱片賣斷市，係時侯要開紅館。家謙就謙稱：「多得你提攜。」軒仔接話：「唔好咁講！係黃金就一定會發光！呢行好公道o！」觀眾即送上無盡掌聲。
林家謙伸手入軒仔衫入面，引起全場觀眾狂呼。(發稿)
接著家謙話，揀平安夜做嘉賓，係為想送聖誕禮物俾軒仔，隨即把禮物帶上台，軒仔即場拆禮物，家謙笑住話 : 「唔駛驚，正經嘢嚟。」禮盒打開後，發現原來是果醬: 「我見你咁悽涼，成日食白麵包，前幾日去買俾你嘅，不過呢幾樽都有少少似你最近d 建築材料，有名堂㗎，呢樽係開心果，呢樽叫糊塗(胡桃)！你記住分開，唔好撈埋，好神奇嘅，有說明書教你點食，每日三次每次兩匙」，引得觀眾哈哈大笑。軒仔亦開心表示，沒有想到自己的早餐會多了一份愛的滋潤：「雖然樽嘢顏色唔係咁開胃，不過唔緊要啦，食落去最尾出來顏色都係差唔多」。
一場來到，家謙沒理由唱半隻歌就走，到他獨唱部份，他死拉軒仔不放：「你唔好交個台比我，太多人我唔慣一個人係個stage到，唔好走啦，你試下走，我同你一齊走！」軒仔笑指:「你搞咩講到咁曖昧，哈哈，你知道㗎，你要咩我都應承你」家謙即搞笑回答，「我要層樓」，接著由軒仔陪著他，獨唱《難道喜歡處女座》給大家。
為迎接聖誕節，軒仔穿上一件由熊仔堆砌出來的聖誕衫。(發稿)
即將踏入聖誕節倒數，軒仔叫場館關燈，台底聽到他喊話: 「有禮物要送俾大家，以往大家聖誕節都係去買禮物，今年我準備左一件搶包新衫比大家！」再升上來時見到他已換了一件猶如一座包山的服裝，由無數bear bear 熊仔砌出的聖誕樹形，非常可愛，隨即又再引發核歡呼。最意想不到是，嘉賓林家謙竟然未走，又再重新上台，與軒仔及觀眾一起開心倒數萬眾歡騰的聖誕節，又齊齊唱改篇的YUU及DONKI聖誕洗腦歌，令現場每一位都開心到飛起。
唱完歌，軒仔話: 「家謙你準備禮物比我，我都準備咗份比你」，接著招手叫他站在自己面前幫忙除衫：「你過來拆禮物啦，你係中間伸隻手入去就得啦。」引得觀眾不停狂叫。
昨晚倒數安歌過後，歌迷並不肯離去，不停呼喚軒公，結果軒仔再送大禮，升回台面，跟大家說: 「今日真係當尾場咁做，唔會令你平安夜失望！」給大家演唱會才真正美滿完結。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
