張敬軒形容為：「石屎定熔岩瓊咗，十足月球表面早晨全餐」。
一向「早餐界KOL」之稱的張敬軒家中除有外傭「遮遮」這位暗黑廚神，原來張媽媽也是「有料之人」﹗軒仔今早在社交網分享早餐照，並以「一遮還有一遮高」為題的片段，見他除烚蛋外，還有一碗灰泥色糊狀的食物。
軒仔寫道︰「呢兜好似石屎咁嘅嘢係我今朝嘅早餐。查實我條命係咪五行缺飯，同老母年幾冇見，諗住佢老人家嚟咗，我應該可以有新嘅開始...... 話說佢係我早餐關注組召集人，成日都問我早餐食乜。到埗第一日，更揚言要我過番啲正常生活...... 我冇異議，呢一切其實都係我日常嘅正常。正所謂天有不測風雲，我冇諗過一嚿風雲過後，原來仲有另外一嚿。本期介紹，張公館特製，唔知石屎定熔岩瓊咗十足月球表面早晨全餐。」網民都紛紛留言爆笑。
而好友許廷鏗竟留言表示想試食，軒仔回應︰「要冇牙先得呀大夫！」，至於陳卓賢（Ian）以為軒仔今日的早餐又是外傭「遮遮」整的，軒仔笑指︰「今次係我阿媽。」最後應智越（細貓）問片段中的那碗東西是否芝麻糊，軒仔終於揭開謎底表示:「我老母話係高熱量早餐，有亞麻籽黑芝麻花生乜乜物物打埋一兜... 我諗佢以為我冇牙。」
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
