許廷鏗(Alfred)日前推出新歌《修羅場》，他在MV破天荒以全新妝容示人，並找來他的歌迷參與拍攝。今日他的歌迷會在IG大談當日拍攝情況，稱Alfred在拍攝當日只要有空閒時間，便會一齊傾偈和影相，令整個拍攝活動變成了一次另類歌迷聚會。
許廷鏗MV內的影子由fans扮演。
當中有些影子比較大。
搵歌迷參與
MV內的影子有不同身形，甚至各人的步伐也不一致，有別於其他類似作品追求統一。Alfred稱《修羅場》是表達他過去的經歷及陰影，製作團隊在構思時認為這些過去的故事是由不同的事情拼湊而成，「因為我心目中想包攬多啲唔同人，喺形態、行走步伐、衝刺快與慢，力度大與細，就好似人嘅歷練咁，人人唔同，大家都經歷唔同，就用呢啲陰影去代表，有啲陰影比較重，對自身衝擊力重啲，有咗呢個構思之後，就覺得有咩好得過係搵fans參與？」
嚇親的士司機
Alfred指拍攝當日的地點比較遠，而完成拍攝時已經是凌晨時份，於是他的團隊及fans leader幫手call車逐一送fans回家。他自爆當時把拍MV衣服上的佛珠，逐串送給他們當作紀念品，但就發生了十分好笑的事情。他說︰「當時佢哋拎住一串串佛珠走，的士司機駛入嚟嘅時候見到都嚇親，以為係咩儀式。哈哈！點講都好，好多謝我啲歌迷，有啲追隨我十一、二年，每一個都好緊要！」
歌迷會上載當日拍攝情況。
一有時間便大家傾下偈。
歌迷變晒影子。
初嘗重眼線妝容
提到Alfred的新妝容，他表示無論在於自己抑或化妝師，都是一次很大膽的嘗試，追隨他逾十年的化妝師及MV導演，也認為這類妝容比較合適。他說︰「坦白講，我開始嘅時候，係有小小擔心，我一直都好抗拒呢類韓妝，好重眼線呢類。不過，最後都俾佢哋說服咗。」他又指因為今次化妝學懂了一些化妝術語，「原本下面個眼妝好實，好似一個好勁黑眼圈，我想淡啲，我就話想『化開啲』，原來化開喺佢哋嘅術語係化個範圍更大，之後佢哋好似係話用個『融』字，於是化妝師就喺我下眼影位置落啲油，好似落咗妝少少，喺我眼中就係想要嘅『化』嘅效果。就係依家MV嘅效果，配埋件衫我都好滿意！」
許廷鏗自言過去甚抗拒這裡妝容。
許廷鏗非常滿意效果。
許廷鏗坦言連自己的化妝師也是首次挑戰這類妝容。
入App免費換走健康產品
