舊年嘅荷李活滿城風雨，全因「Oscar So White」議題不斷發酵，由以為會憑《震盪真相》提名最佳男主角嘅韋史密夫燃點導火線。無可否認，史密夫近年演技進步唔少(至少冇咁造作啦)，當然識揀劇本亦係主因之一。話晒都喺荷李活浮沉多年，自然知道點為之「有攞獎相」嘅劇本，喺即將完結嘅2016年，佢只有兩部作品，一部係Popcorn戲《自殺特攻：超能暴隊》，另一部就係擺明博攞獎嘅《最美麗的安排》。文：Wing
寫信給死亡 時間 愛
《最》片導演大衛法蘭基爾，雖則唔算知名大導，但亦偶有佳作，如艾美獎得獎美劇《雷霆傘兵》，但今次唔係男人戲，戲路較似前作《唱Opera的保羅》。《最》講嘅係一個洋蔥味濃烈嘅故事，賣點係「寫信給死亡、時間和愛」，主角紐約廣告界巨子(韋史密夫飾)喪女及遭遇人生巨變後封閉自己，更開始寫信俾愛、時間和死亡，尋求人生難題答案。
金球獎零提名
來屆金球獎提名名單早前公布，《最美麗的安排》零提名，而嚟緊1月尾公布入圍名單嘅奧斯卡，韋史密夫同《最》片都似乎好忟水。查實，講人生，談生死，一向好啱學院派嘅奧斯卡口味，但《最》片主角對白少得可憐，考嘅係演員真功夫；雖然戲中有唔少場口俾韋史密夫騷演技，例如緬懷過去、谷眼淚等，但接唔接得住，大家入場就明白。
金像級演員夾擊
識揀劇本嘅，當然唔止史密夫一個，導演今次四出搵大星飾演配角，最終由愛德華諾頓、琦溫絲莉、米高皮拿及娜奧美夏莉絲等，群星拱照史密夫，而最大賣點──識行識走嘅「愛」、「死亡」同「時間」，就由姬拉麗莉、海倫美雲及雅各拉提摩飾演。好明顯，幾個當紅影星演技交鋒，史密夫已難招架，再加埋演技派嘅海倫美雲同琦溫斯莉，佢仲點頂得住？
A Cast B隊
據講，導演先後搵過唔少大星參演呢部戲，本來屬意曉治積曼飾演主角，臨門一腳改由史密夫主演，而麗素麥雅當絲亦曾經答應演出，最終因為拍《奇異博士》就唔到期而推咗，就連一早應承咗會拍嘅朗妮瑪娜都甩底，最搞鬼嘅係，其實導演本來都唔係大衛，而係《初戀有病》導演Alfonso Gomez-Rejon，只係佢同電影公司New Line Cinema傾唔掂數先換人。
愛德華諾頓、琦溫絲莉及米高皮拿飾演主角好友兼同事。
扮演「死亡」嘅海倫美雲、「愛」嘅姬拉麗莉及「時間」嘅雅各拉提摩，查實戲分同史密夫差唔多。
入App免費換走健康產品
