《攻殼機動隊》(Ghost In The Shell)被譽為本年度首季最期待電影之一，原著fans遍布全球，絕對稱得上神作。但若果你唔係機迷或者原著動漫迷，相信睇完預告後，除咗可以仰天長嘆一聲「好強嘅CG啊」之外，相信都好難理解佢點解咁神。為咗讓非fans觀眾睇得更投入，依家先嚟惡補一下《攻》系列嘅威水史。
文：Wing
原著──Cyberpunk經典
日本漫畫家士郎正宗由1989年起連載嘅同名漫畫，被譽為Cyberpunk經典作品。所謂「Cyberpunk」，其實係科幻小說嘅一種，兩者差別在於，Cyberpunk除咗背景設定於未來反烏托邦世界之外，情節設計亦考慮到現代科技發展因素，例如電腦、人工智能等新世代科技。原著故事發生於2040年嘅日本新濱市──一個經歷第三及第四次世界大戰嘅時代，人類紛紛將大腦電腦化，甚至將四肢換成義肢；但電腦化既帶來生活便利，同時亦催生新型犯罪手法──駭客入侵，於是政府成立「公安九課」遏抑罪案，而主角「少佐」草薙素子就係九課隊長。此漫畫系列之所以備受追捧，唔止因為題材新鮮，同時，作者對未來嘅構想備有文字詳解，唔係一味靠作，而且充滿對哲學及社會等方面嘅探討。
改編作品──95年動畫片最神
改編自士郎原著嘅作品多不勝數，涵蓋電視動畫、動畫電影、劇場版電影及電玩等範疇，最為人所知嘅作品，就係95年由押井守執導，並由士郎正宗聯同伊藤和典編劇嘅同名動畫電影，奠定此系列灰色陰暗風格(原著較輕鬆幽默)。片中以未來反烏托邦世界為背景，將超強戰鬥力嘅全義肢化駭客素子，活靈活現呈現大銀幕，同時又塑造出一個全能而又深得下屬敬重(稱呼佢「少佐」)嘅女隊長，透過駭客任務等情節，塑造出一支情義兼備、型到飛起嘅「公安九課」，成員包括義肢度低但勝在識拆局嘅「課長」荒卷大輔、素子裝有「義眼」嘅好拍檔巴特等等。此片當時不但為原著打響名堂，而且名列各大電影雜誌經典動畫片排行榜；至於04年續集動畫電影《攻殼機動隊2之無邪》，冇咗原作者做編劇，改由押井守親自按原著漫畫第一部第六章〈Robot Rondo〉編寫，口碑票房仍然唔錯，唯一被指畫風不及首集，其他作品仲有2006年嘅《攻殼機動隊：Stand Alone Complex - Solid State Society》、2015年嘅《攻殼機動隊 新劇場版》等等 ……
首部真人版電影──重現元祖版
早喺2008年，夢工場同史提芬史匹堡獲得《攻》真人電影改編權，但2015年至2016年間，電影主導權轉完又轉，曾由迪士尼、夢工場及環球電影等經手，最終由派拉蒙發行、夢工場主導製作。主角人選方面，片商本來有意搵瑪歌羅比飾演素子，後來夢工場又以1,000萬美元片酬，力邀施嘉莉祖安遜擔演，喺歐美掀起「太白」爭議(但日本fans普遍支持)。作為系列首部真人版電影，編劇似乎有意忠於95年動畫版及原著，劇組舊年就特意到油麻地一帶取景，重現fans著迷嘅(疑似)香港背景，同時亦會重現經典人物如藝伎及機械人公司「阪華」等；至於主角造型，當然亦跟到足，女主角跟當年動畫一樣，一頭短黑髮(《無邪》係束馬尾的)；不過當中亦有唔少改動，少佐冇咗原名草薙素子，只叫「The Major」，更將反派久世英雄及傀儡師「合二為一」。溫馨提示吓大家，唔好寄望此片有太多哲學性討論。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
