![Sammi演唱會請來林峯做嘉賓。](https://cdn.am730.com.hk/s3fs-public/styles/article_image/public/2024-07/IMG_5456_0.jpg?itok=8GW9clRf)
Sammi演唱會請來林峯做嘉賓。
鄭秀文(Sammi)昨晚(23/7)在紅館舉行第9場「You & Mi 鄭秀文世界巡迴演唱會2023」(Rescheduled ),小師妹黃淑蔓、Tim@Dear Jane、方皓文、音樂人蘇道哲、SuperGirls的Yanny和Jessica、唐詩詠和商台DJ阿強等捧場。表演嘉賓林峯出場,震撼全場,手拖手合唱《愛在記憶中找你》,他追問網上流傳嘉賓名單是不否有古天樂?Sammi澄清:「假㗎!」他即笑說:「早知唱《今期流行》啦!」
![Sammi穿上特別訂製的紅色巨型玫瑰花裙。](https://cdn.am730.com.hk/s3fs-public/styles/article_image/public/2024-07/IMG_5440.jpg?itok=MOau4GY6)
Sammi穿上特別訂製的紅色巨型玫瑰花裙。
Sammi穿上紅色巨型玫瑰花裙,出場演唱《哭泣遊戲》 、《上一次流淚》和《如何掉眼淚》等眼淚系列歌曲後,被舞台效果的白色泡泡灑滿一身,她笑說:「成面都係,頭先仲滴咗啲落咀,吞埋佢,真係『留藏在血管裏』(《如何掉眼淚》歌詞)」然後她介紹嘉賓出場,說:「今晚呢個Bonus 就厲害啦,我驚你哋開心到拆天。呢個嘉賓呢,我就由細睇佢嘅TVB劇睇到大,呢位嘉賓最近著火呀,好Hot!總之我細細個就睇佢嘅戲長大啦!好,去歌先。」歌曲前奏響起,全場立即尖叫,Sammi驚歎:「咁快認得?兩秒咋喎,咁勁揪?!」
![Sammi稱自己一直睇林峯的戲大,而林峯就回應說︰「其實我都係睇你嘅戲大!」](https://cdn.am730.com.hk/s3fs-public/styles/article_image/public/2024-07/IMG_5450.jpg?itok=1IISzXAt)
Sammi稱自己一直睇林峯的戲大,而林峯就回應說︰「其實我都係睇你嘅戲大!」
林峯從舞台中間升上,合唱《愛在記憶中找你》時手拖手滿場飛,期間林峯用手帕替Sammi抹去頭上的泡泡,盡顯紳士風度。唱畢,Sammi感謝林峯百忙中抽空擔任表演嘉賓,他自爆太興奮,出發紅館前在家中弄損手。他問Sammi說:「網上流傳嘉賓名單,點解今日係『待定』?(梗係唔係啦,假㗎!)我仲睇到個名單有『龍捲風』即係古天樂,其實你好多次演唱會都請佢嚟⋯(假㗎,佢話唔得閒喎)哎呀,早知頭先同你合唱《今期流行》啦,你又跳得!」他還邊說邊跳幾步經典動作,全場爆笑。
![林峯用手帕替Sammi抹去頭上的泡泡,盡顯紳士風度。](https://cdn.am730.com.hk/s3fs-public/styles/article_image/public/2024-07/IMG_5451.jpg?itok=wNoSef6x)
林峯用手帕替Sammi抹去頭上的泡泡,盡顯紳士風度。
然後Sammi表示要送林峯禮物,就是一大碗叉燒飯,林峯見狀笑說:「多謝你,好『大』舊叉燒呀!」Sammi說:「好大碗飯,但得一粒叉燒,依家叉燒貴!鍾唔鍾意?係咪好有意思?」林峯在電影《九龍城寨之圍城》因為一碗叉燒飯展開在城寨的故事,他高舉叉燒飯跟觀眾打招呼,說:「大家好,我係『陳洛軍』!」全場歡呼。Sammi認真地說:「林峯喺呢行嘅演藝生涯,都係有血有淚,呢碗叉燒飯食落去都真係滋味在心頭!」豈料林峯說:「多謝,其實我都係睇你嘅戲大!」Sammi「嘩」聲大叫,笑住返回後台。
![林峯獲Sammi送上叉燒飯,但叉燒僅得一塊,非常搞笑。](https://cdn.am730.com.hk/s3fs-public/styles/article_image/public/2024-07/VS--YouTube-YouMi2023Rescheduled--6%E2%80%9933%E2%80%9D.png?itok=fyudg-lt)
林峯獲Sammi送上叉燒飯,但叉燒僅得一塊,非常搞笑。
之後林峯獨自在舞台,說:「我上一次喺紅館唱歌都幾年前,其實我出年都有機會重返紅館,如果再近啲嘅就係九月份喺澳門都有騷嘅,到時希望大家賞面啦!今晚Aammi個舞台靚到爆,我好鍾意,尤其是可以同觀眾咁近距離接觸。」然後他一邊唱《愛不疚》一邊跟觀眾握手。
Encore環節,Sammi唱《盲盒》後全場大合唱《如果我們不再見》和《我們都是這樣長大的》,雖然Sammi今次演唱會沒有握手環節,但她跑勻全場禮物和觀眾鞠躬致謝。她還向觀眾力推昨日YouTube 上架新歌《從前的我們》,說:「大家跟一跟我新歌,歌詞好感人㗎!」完場後,Sammi到場外跟歌迷道謝和簽新碟,數百歌迷企滿紅館外和火車站外圍,非常熱情。