Tiger@MIRROR執導短片，獲MIRROR兄弟Lokman、AK、Frankie、Jeremy和梁祖堯等，不收分文協助。
MIRROR成員Tiger(邱傲然)繼為MIRROR《破鏡》MV執導後，獲《第十七屆鮮浪潮國際短片節》邀請執導短片《是日精選》，Tiger獲MIRROR兄弟及圈中好友力撐，隊長Lokman(楊樂文)兩脇插刀，由副導轉做男主角，副隊長Anson Kong(江𤒹生)則自薦頂上做副導，全部不收分文演出，還有擔任監製的花姐碌盡人情卡，廣邀幕後好友幫忙。Tiger笑言識人好過識字。
注入喜愛的港產類型片元素
機會難得，Tiger在短片中注入自己喜歡的港產類型片元素，「大家Brainstorm拍乜嘢類型時，就諗有乜嘢係好鍾意嘅元素，第一樣諗到就係車，因為我由細到大都好想有一條片，不論演出或以任何形式參與，係同車有關就好！難得今次真係可以有咁大空間，唔理啦！拍咗再算！」短片於早前開售反應理想，6場門票即被秒殺，大會今日宣布再加開7場，門票於周三(17日)開售。
放假接花姐order
談到今次執導的機遇，Tiger坦言也不知因由，回想起只道：「我之前喺加拿大放假時收到花姐電話，一打嚟就係叫我拍片，而唔係問我拍唔拍，應該係因為喺鮮浪潮頒獎禮講咗幾句嘢。」Tiger於去年的鮮浪潮國際短片節頒獎禮中，曾自我介紹說：「我今日來是尋找工作機會，大家好我是MIRROR的下弦Tiger。」或許，正因這份幽默坦然，為讀電影出身的Tiger帶來執導今屆鮮浪潮電影節的開幕短片《是日精選》的機會。
兩個月內開工
接過電話後，Tiger在短短兩個月內，由零開始構思劇本、搵齊人開工拍攝，時間不長也不短，不過因為拍攝與車有關的故事，不但時間變得緊迫，難度也相對提高。Tiger道：「香港地拍嘢Budget有限，冇咁多空間失誤，各樣嘢都要好精準！」所以他邀請了《花組ERROR遊》、《ERROR自肥企畫》、《殺手廢J》的編劇麥可暉撰寫劇本，MIRROR兄弟楊樂文(Lokman)任副導演，豈料從詳計議後，發現難有合適人選當男主角，Tiger十分感激Lokman隨即兩脇插刀肩負起男主角的重任，更謂：「Lokman叫到佢一定做。」
台前幕後正副隊長齊出動
Lokman轉當主角，MIRROR另一個好兄弟AK即自薦做副導演，但Tiger笑言：「佢又貪玩、想玩，而且男仔一定鍾意車，又知道Lokman做男主角，又有其他演員（岑珈其、陳瑞輝、李駿傑、梁祖堯、邱頌偉、黎美萱、林子傑）一齊玩，一聽到呢個班底都心郁想嚟參與啦！不過AK做得好好，第一次做副導，佢都跟得好足好細心。」
對於擔任新導演的Tiger來說，今次在鏡頭後既緊張又刺激，他直言腎上腺素飇升！Tiger分享道：「第一個Shot第一個鏡頭就係Lokman同Ronald喺廁格動作戲，比起文戲，處理又多咗。除咗場口處理外，喺現場成隊crew咁多人，仲要雙機拍攝，已經比起我哋諗嘅鮮浪潮Project又再大咗，現場要控制咁多人去做一件事，溝通交流好緊要。」用到這個規模拍攝一條短片，Tiger透露，要多謝擔任監製的花姐幫忙，並說：「班底係花姐幫手碌卡，搵到好多好好嘅Crew幫手做呢件事，以呢個空間、資源本來係好難做到呢個Scale嘅事，但好好彩，真係識人好過識字。」
《是日精選》故事
《是日精選》講述黑道車手阿仁喝慣的茶餐廳例湯向來沒加紅蘿蔔，是日碗中竟意外有兩大塊，難道要來的始終還是會來？平日揸車搵食不問江湖是非，這夜看不過眼，為救妙女郎做一晚英雄，卻觸犯了自己的忌諱，是命運使然還是因果報應？