2024-12-09 21:00:24

Twins北美巡唱遇6級地震阿Sa嚇跳床阿嬌唔覺震

《Twins Spirit世界巡迴演唱會》北美巡演來到最後一站RENO，開騷前兩人遇上當地6級地震，慶幸大家安然無恙。上周五早上10時多，蔡卓妍(阿Sa)還在夢中，她表示：「我仲瞓緊，突然聽到房門『啪啪』聲，最初以為拍門，然後發覺窗門都『啪啪』聲，打電話問工作人員係咪地震，佢哋仲笑我發開口夢。但見到浴缸水搖到勁大波浪，我好驚，未感受過咁強地震，即刻跳上牀縮喺頭頂冇任何嘢嘅地方，天花板大燈冇乜大搖，但我都驚會跌落嚟。」

阿嬌瞓到唔覺地震

阿Sa話工作人員都感覺到地震：「唔怪得到埗後，有工作人員喺酒店用指南針度方位，幾次都度唔到，我哋仲講笑話係咪有鬼，應該係地殼前一日已經慢慢移動緊，所以就度極都怪怪咁。」鍾欣潼(阿嬌)則感覺不到地震，她笑言：「我瞓緊覺，真係乜都感覺唔到。」Twins在12月20日再到倫敦OVO Arena開騷，阿Sa坦言期待與英國歌迷見面，更期待完成工作後留英國遊玩。