梅艷芳兄長梅啟明（左）參加《中年好聲音2》海選。
TVB歌唱節目《中年好聲音2》呢期搞緊海選，今日有消息指，已故天后梅艷芳兄長梅啟明都係參加者之一，仲去埋電視城面試，獲梅啟明本尊確認消息。
捨梅艷芳歌曲 唱《小李飛刀》
有傳媒向梅啟明求證參加《中年好聲音2》一事，梅生承認真有其事。梅啟明話係朋友幫佢報名，本來都唔知嘅，但見有機會就去面試，當係玩吓。梅氏兄妹童年時曾經以表演幫補家計，但梅啟明好謙咁話唱歌唔係好叻，唔及阿妹梅艷芳，所以冇咩信心入圍。
梅啟明揀咗羅文嘅《小李飛刀》做參賽歌曲，雖然唔係唱梅姐作品，但都因為諗起細個同妹妹嘅戲班生活而一時感觸，唱到一半已經流淚。梅生話唔揀梅姐嘅歌，係因為驚未唱就喊。
梅啟明肥媽老友鬼鬼重逢
面試當日，梅啟明仲見返相識多年嘅評審肥媽，梅生話肥媽都有問候佢身體好唔好。梅啟明早前喺餐廳工作時跌親而入院多日，而家可以唱歌面試，相信狀態都有返咁上下。
原文刊登於 Yahoo 娛樂圈
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
