![前J2主持文頌男不幸離世 終年29歲](https://cdn.am730.com.hk/s3fs-public/styles/article_image/public/2024-07/2_35.jpg?itok=p47nD51B)
曾為J2台擔任主持的文頌男(Koba)不幸離世,終年29歲。
前J2節目《不正常愛情研究所》主持人文頌男(Koba),去年年底自揭在椎間近盤骨附近位置確診癌症「尤文氏肉瘤」,需全面停工休息及接受治療,無奈病情反覆。今日(13日)晚上,文頌男的IG突然更新,卻公布他與世長辭的不幸消息,貼出他在7月10日的一篇長文。文頌男終年29歲,他患病後一直勇敢抗病及接受化療,今年3月更一度復工,再度亮相節目《不正常愛情研究所》,可惜今晚卻傳來離世噩耗。
文章如下
好抱歉,喺呢度要同大家講一啲好沉重嘅事。當大家睇到呢一篇文章嘅時候,我已經離開咗人世。呢幾個星期以嚟,我一直努力接受自己身體上嘅變化。呢段時間,我選擇咗唔對外透露自己嘅病情,亦冇同任何傳媒交代,因為我未有勇氣去接受呢啲變化。
其實,早喺2024年6月22號,我就因為下半身完全癱瘓、完全郁唔到、冇任何知覺而入院。呢個情況亦令我排唔到尿,所以當時要緊急送入醫院。自從入院以嚟,到我撰文呢一刻(2024年7月10號),已經接近三個星期。唔好講病情冇好轉,反而越嚟越差。胸口以下仍然係完全冇知覺,完全控制唔到排泄功能,需要換尿片同埋插尿喉。癌細胞已經擴散去好多唔同嘅位置,例如胸、肺、多個脊椎、淋巴,甚至有啲腫瘤我可以喺外部摸到。有知覺嘅地方都感覺24小時都好痛,例如肩胛骨、頸椎、頭皮。我仲有氣促,心跳長期偏快,依家要吸氧。每朝早都會有發燒嘅感覺,不過量體溫就量唔出發燒,而且仲會覺得好凍,但就出曬汗,身邊嘅人感覺我發緊熱。醫院已經開咗好多唔同嘅藥畀我,不停調整劑量,雖然有抑制到大部分症狀,但仍然都係好辛苦、好唔舒服。
醫生同我商量過,再做康復治療都冇作用,只能夠做一啲舒緩性治療,見到有咩症狀就做相應治療抑制住佢,等我過得冇咁辛苦。簡單嚟講,依家就係等緊死,純粹希望死得舒服啲。喺人生嘅最後一哩路,非常感謝親友同各界人士一直以嚟嘅支持同關心,呢段旅程有你哋陪伴,我感到無比幸運同感激。