雖則依家先至7月，距離明年3月奧斯卡仲有七個多月，但多位金像級大導演近來已動作多多，積極籌備新作。先有「奉行」一年一新作嘅活地阿倫先拔頭籌，發布新片《Wonder Wheel》劇照；再有奇連伊士活為新作搵「演員」埋班；而馬田史高西斯將再會兩大老拍檔羅拔迪尼路及里安納度狄卡比奧，就連之前宣布收山嘅昆頓塔倫天奴都確認「復出」，開拍佢第一部改編真人真事嘅作品，相信來年嘅荷李活/奧斯卡會相當熱鬧兼充滿話題性。
文：Wing Lam
摩天輪的浪漫
活地阿倫上一部作品，已經係年幾前康城影展開幕電影《情迷聲色時光》，一年過去，阿倫又相當準時推出新作《Wonder Wheel》。今次佢搵嚟金球獎最佳女配角琦溫絲莉擔正，一向敢於嘗試新班底嘅佢，男主角方面搵嚟美國流行樂壇天王Justin Timberlake坐鎮。故事發生於五十年代紐約，片名Wonder Wheel係指紐約布魯克林附近嘅Deno’s Wonder Wheel Amusement Park地標Wonder Wheel。據講該片故事將圍繞男女主角愛情，當中牽涉不忠等愛情黑暗面，仲會加入黑幫元素作副線。不過，由於阿倫叔叔目前仍忙於製作電視劇，而新作《Wonder Wheel》又已經公布今年12月於美國上映，睇嚟佢下半年都冇時間再表演吹色士風了。
琦溫絲莉於《Wonder Wheel》的造型有啲似《華麗轉身》。
首次改編真人真事
昆頓塔倫天奴喺2015年底推出《冰天血地8惡人》時揚言收山唔再執導，話咁快，唔夠兩年又「復出」。眾所周知，塔倫天奴唔見血唔出手，雖然新作品都牽涉殺人案，不過佢將會首次改編真人真事。有傳佢正籌備開拍關於六十年代活躍於美國加州嘅犯罪集團Manson Family嘅電影，呢個組織當年犯下多宗連環殺人案，當中以《Valley of the dolls》金球提名女演員Sharon Tate謀殺案最為轟動。當時正懷孕8個月嘅佢，同朋友喺屋企開小型派對，遭該組織成員闖入屋殺害，Sharon身中16刀，當場死亡。據講塔倫天奴今次會以呢宗慘案作為主線，而且仲已開始物色演員，有傳畢彼特、珍妮花羅倫絲及瑪歌羅比都將會casting呢部戲，預計電影將於明年8月夏天開拍。
塔倫天奴將以1969年的Sharon Tate謀殺案作為新片主線。
真士兵‧大美國
現年87歲嘅美國老牌導演奇連伊士活，愈老愈有火，愈拍愈有貨。繼喺北美票房成績相當好嘅《美國狙擊手》及《薩利機長：迫降奇蹟》後，奇連下部作品《The 15:17 to Paris》，繼續改編真人真事，以Anthony Sadler所著嘅小說為藍本，講述3位美國士兵喺巴黎火車上成功阻止恐怖襲擊發生；主題貫徹其大美國英雄主義，今次更搵嚟3個真士兵主演，而年輕版主角就由Paul-Mikel Williams、Max Ivutin、Bruce Gheisar、Cole Eichenberger及William Jennings等人飾演。
(左)伊士活新作將改編Anthony Sadler原著小說。 (右)《VEEP》男星Tony Hale(左)將會參演《The 15:17 to Paris》。
老拍檔歸位
作為黑幫電影大導演，馬田史高西斯終於回歸正宗vintage黑幫電影。舊年佢已經宣布，拍完籌備十幾年嘅《沉默》之後，會開拍想拍好耐嘅《The Irishman》。此片卡士相當厲害，史高西斯兩大拍檔羅拔迪尼路同里安納度狄卡比奧將會回隊，而近排亦公布，曾於《狂牛》飾演Jake(羅拔迪尼路飾)兄弟嘅Joe Pesci亦會重回史高西斯懷抱。呢部戲劇本改編自Charles Brandt著作《I heard You Paint Houses by》，書中記錄了已故美國前勞工工會官員Frank Sheeran向作者「自首」嘅內容，承認早年殺害卡車司機國際兄弟會領導人，事件更牽涉當年黑幫組織「黑手黨」頭目Russell Bufalino及Angelo Bruno，而《The Irishman》將會以聰明罪犯Sheeran一生為主線，講述佢由卡車司機變成黑幫殺人犯 。
曾主演史高西斯名作《狂牛》的Joe Pesci將會參演《The Irishman》。
🎁 amJetso請你睇《焚城》，快Ｄ開APP玩👇 👇
