美國時間星期二晚有個本來幾有份量嘅訪問︰影視雙線發展嘅阿哥級藝人艾力寶雲Alec Baldwin，喺IG訪問大導演活地阿倫。用得「本來幾有份量」形容，你明嘅。艾力寶雲舊年十月喺拍戲期間，誤用道具槍射死攝影師，而活地阿倫喺#METOO風潮之下，被指涉嫌性侵養女，作品當堂被冷處理。兩個都係同是天涯羅樂林，難怪艾力寶雲訪問前出post都話明對外界嘅批判零興趣，打返個底。
呢兩位唔少負皮嘅男士對談，其實有嘢落袋。活地阿倫訪問期間提到，電影放上串流平台係大勢所趨，但因此令作品喺戲院上畫時間越來越短，令佢老人家好冇癮。加上新冠疫情，令佢更肯定呢個睇法。
活地阿倫又話，疫情期間佢同大家一樣，摺埋喺屋企唔出去，本來有套戲要籌備但乜都做唔到。幾個月後，大師開始諗……其實咁都幾好，唔使拍戲，唔使晨早起身處理一大堆嘢，有時間就做下運動寫下書，畢竟都八十有六嘞。於是活地阿倫打算拍多一套戲，亦即係第50套作品，就正式收山。
大師打算今個秋天喺巴黎拍呢套收山作，以往活地阿倫唔少作品會喺最愛嘅紐約開工，但係近年佢經常去歐洲取景，因為覺得咁樣「離家出走」幾爽。活地阿倫又話，唔拍戲嘅話佢會專心寫書寫專欄。
🎁 amJetso請你睇《焚城》，快Ｄ開APP玩👇 👇
