2019-07-26 05:15:00

封莫文蔚做偶像 Sammi獲邀演音樂劇

鄭秀文(Sammi)的《＃FollowMi世界巡迴演唱會》昨晚舉行第11場，這亦是她在紅館舉行第100場演唱會，這晚請來她非常欣賞的莫文蔚(Karen)擔任表演嘉賓，Sammi指，Karen的歌她長年跟身，Karen則邀請Sammi演出音樂劇。

Sammi介紹Karen出場時，已難掩興奮，她說：「今晚嘉賓係個人my favorite，佢嘅歌我長年跟身，成日都會聽佢嘅歌，雖然佢比較少喺香港同大家表演，所以今次能夠邀請到自己鍾意嘅女歌手同台，我真係好開心。」音樂響起，身穿紅色裙的莫文蔚從升降台出場，她一開口唱《忽然之間》，全場吶喊，Sammi恍如小fans，說：「嘩，好好聽呀！」她們手拖手唱歌，又扮行catwalk。

被讚唱演跳俱佳
唱畢，Karen說：「我哋未同台做過任何嘢，我唱咗26年，等你呢個電話等咗幾耐？」Sammi笑說：「由水壼(電話)年代等到依家，你係我all time favorite，真係好鍾意聽你唱歌，你接受邀請，我真係好開心。不過我睇報道知你好快開埋最後一次演唱會，就唔再做pop music嘅concert。」Karen坦言：「係，我同自己講，要喺最好嘅時候，將最好嘅自己俾咗大家，然後要做下一樣嘢。(即係咩？)Musical。」Sammi稱，明年2月是Karen最後一次演唱會，揚言要去捧場。Karen邀Sammi一齊演音樂劇，她說：「其實你適合做Musical，識演戲、唱歌、跳舞，唱live仲咁好。」之後Sammi落台換衫，Karen獨唱《如果沒有你》，全場觀眾大合唱。