![](https://cdn.am730.com.hk/s3fs-public/styles/article_image/public/2024-08/ffffff.webp?itok=Zktds9AT)
《射雕英雄傳之鐵血丹心》
TVB外購劇《射鵰英雄傳之鐵血丹心》演員包括此沙、包上恩、王弘毅、黃羿、周一圍、高偉光、何潤東、明道、孟子義等等。不過,有網民睇完覺得劇集拍得好唔掂,而且認為女主角包上恩個樣唔討好,反而女配角孟子義因靚樣廣受讚賞,更被封成「最美梅超風」。
不如睇返龍虎門漫畫啦
《射鵰英雄傳之鐵血丹心》劇情講述於南宋時期郭、楊兩家慘遭滅門,郭家後人郭靖(此沙飾)流亡大漠成長,一次機會下得到「江南七怪」傳授武藝,郭靖背負家仇闖入江湖,一路歷經奇情奇遇,並於一次下江南時偶遇嘅黃蓉(包上恩飾),喺黃蓉幫助下,成為國為民嘅俠之大者。另外,楊家後人楊康(王弘毅飾)將金人當作父親,甚至協助金人多次加害郭靖和黃蓉等武林中正義之士,又與生父楊鐵心義女穆念慈(黃羿飾)展開一段虐戀。
已故武俠文學泰斗金庸(查良鏞)嘅作品已曾多次被改編成唔同嘅電視劇及電影,網民認為《射鵰英雄傳之鐵血丹心》劇情節奏太快及改編得太多:「射雕神雕倚天呢啲真係做到厭,見到廣告都已經唔想睇」、「拍都拍到爛晒啦」、「只係睇到好嬲!改到七彩!」、「講堅,故事推進係快,快得緊要,變咗人物描繪相當薄弱,打係好睇,但不斷打,我不如睇返龍虎門漫畫啦」等等。
包上恩被指歪嘴
又有唔少網民覺得女主角包上恩唔夠靚:「包上恩歪嘴」、「黃蓉(包上恩飾)就爭啲」、「包上恩現代硬照還可,古裝反而遜色,而且說話時歪咀」、「單係哩張相女角已經換得」等等,而網民就覺得女配角孟子義更美,封其為「最美梅超風」。
28歲孟子義畢業於北京電影學院,當時就有「北影校花」之稱,曾於2017年版《射鵰英雄傳》中飾演穆念慈,獲封「最美穆念慈」;今次演出新版《射鵰英雄傳之鐵血丹心》梅超風,由於孟子義擁有超高顏值,有網民就話甘願死喺佢嘅絕技「九陰白骨爪」之下。
原文刊登於 Yahoo 娛樂圈