![張敬軒現身在美國展開他的巡唱。](https://cdn.am730.com.hk/s3fs-public/styles/article_image/public/2024-07/2024HINSLV-1064.jpg?itok=91x64_As)
張敬軒現身在美國展開他的巡唱。
張敬軒正式展開《The Prime Classics HINS CHEUNG LIVE張敬軒演唱會》美加巡迴,首站於美國拉斯維加斯舉行,這亦是繼去年倫敦三場、澳門十四場後,第十八場「The Prime Classics」的演出。
作為美加巡首站,這次場地位於拉斯維加斯Caesars Palace的The Colosseum,以往有不少國際級歌手曾於這個場地演出,如Celin Dion及去年軒仔來看她的show的Adele,絕對是殿堂級的場地。據知,場地已多年未有邀請華人歌手到場演出,難怪軒仔表示既榮幸又興奮,而且亦覺得別具意義,「今晚可以企喺呢個舞台上面,好開心,我仲用Adele嘅化妝間同埋坐佢張櫈㖭呀!」
![張敬軒正式展開《The Prime Classics HINS CHEUNG LIVE張敬軒演唱會》美加巡迴。](https://cdn.am730.com.hk/s3fs-public/styles/article_image/public/2024-07/2024HINSLV-1015.jpg?itok=l4OeDX88)
張敬軒正式展開《The Prime Classics HINS CHEUNG LIVE張敬軒演唱會》美加巡迴。
雖然相距一年再於拉斯維加斯開show,再加上日前微軟死機,令各地機場大癱瘓,但各地歌迷如紐約、芝加哥、洛杉磯、西雅圖及墨爾本等,依然排除萬難到場睇show,軒仔十分感謝,「多謝大家不理千里、萬里嚟到拉斯維加斯嚟睇我嘅演出,知道增加咗佢哋嚟嘅難度,有啲要飛廿幾個鐘、有啲飛咗去某個地方,然後要坐十個鐘頭車到,各式其適以唔同嘅方法抵達演唱會場地,好彩大家都可以齊齊整整嚟到。」
當晚演唱會歌單除了新歌《青春告別式》,亦有不少軒仔的代表作,當大合唱完《餘震》後,軒仔興奮地說:「你哋知唔知啱啱嗰刻知唔知發生乜嘢事?我喺台度,好多朋友同我一齊唱呢首歌,突然之間見到呢位外籍女士,佢識唱《餘震》呀!佢真係好犀利!突然間令到我覺得自己好似一個外國明星,好犀利呀!我第一次見到有外籍人士唱我啲歌,除咗我『遮遮』之外。好神奇!我想話,你(外藉女士老公)都真係好有福氣,你老婆愛你愛到連廣東歌都學。」隨即全場歡呼。
![當晚演唱會歌單除了新歌《青春告別式》,亦有不少軒仔的代表作。](https://cdn.am730.com.hk/s3fs-public/styles/article_image/public/2024-07/2024HINSLV-1101.jpg?itok=XBRSkV8X)
當晚演唱會歌單除了新歌《青春告別式》,亦有不少軒仔的代表作。
演唱會亦有落台握手環節,不過落台前,軒仔語重深長地着歌迷要冷靜一點,原來因為去年新加坡站的「陰影」,更笑說大家不用錫住他,最緊要錫住支咪,「上次我哋喺新加坡,因為大家太熱情已經撞跌我支咪,我支咪特登send去德國整,整咗我兩隻勞力士嘅價錢,所以希望陣間大家唔錫住我唔緊要,一定要錫住我支咪,知唔知?哈哈。我好易搞嘅啫,但係我支咪難搞。」歌迷亦十分聽話,最後軒仔人咪安全返回台上。
![演唱會有落台握手環節,張敬軒呼籲大家要錫住他手上的咪。](https://cdn.am730.com.hk/s3fs-public/styles/article_image/public/2024-07/2024HINSLV-1122_0.jpg?itok=_Hh2tFGs)
演唱會有落台握手環節,張敬軒呼籲大家要錫住他手上的咪。
除此之外,向來寵粉的軒仔這次亦帶了T恤送給歌迷,而且他更「效法」Adele去年演唱會上派發給歌迷T恤的方式,不過是「加強版」,「佢送禮物送T恤俾觀眾係有支槍嘅,一射就射到好遠,但今次我冇準備到支槍,但我準備咗一支炮!因為佢應該可以射到好遠,哈哈。好彩今晚唔係好多小朋友喺度啫,事不宜遲,呢個時候我請我支炮出嚟先,呢個美國friend好勁,佢可以射得好⋯⋯ 呀,唔係,揈得好遠㗎。」
隨後二人瘋狂將tee拋向觀眾,氣氛熾熱。拋完Tee後,有歌迷大叫「拋埋軒仔」,於是美國朋友立即抱起軒仔作狀將他拋出,全場立即狂呼,最後,軒仔安全於台上着陸,「嘩!嚇死我呀!你哋知唔知我咁大個仔第一次俾人抱起。」引得全場爆笑。