曾比特（Mike）參與TVB與內地芒果TV合辦嘅歌唱節目《聲生不息》，佢就好開心可以與多位前輩喺同一舞台上演出；曾比特亦成功憑動人歌聲及爆炸頭造型深受內地觀眾注意，更一度登上微博熱搜。其實曾比特喺歌手身分出道前，曾參與ViuTV《全民造星II》，不過當時以短髮造型示人，到底又係咩原因令佢後來將頭髮電成爆炸頭？
曾比特指兩三年不會轉髮型
早前，曾比特接受美國華語節目《偶像名人堂》訪問，除咗重提當時參加《全民造星II》原因及未來音樂風格等之外，佢亦公開變成爆炸頭嘅原因。曾比特表示，係因為其中一次《全民造星II》表演而電髮，指爆炸頭係來自一個錯誤：「我嗰陣諗住係電一個韓仔感嘅鬈曲髮，唔知點解，可能因為我天然有少少攣毛嘅關係，電完出嚟之後就唔知點解變咗爆炸頭！」仲提到，身邊人都覺得好襯佢；而曾比特亦喺其他訪問中講過自己好鍾意爆炸頭髮型，認為唔洗特別打理，只要用多啲護髮素及保濕即可，睡醒後用手弄鬆頭髮就出得門口。爆炸頭亦成為曾比特嘅標誌，故此佢表示未來兩三年都唔打算轉髮型，而髮型師建議曾比特每兩個月補電一次，不過佢表示自己怕禿頭，所以隔4個月先補電一次頭髮。
amJetso 送BIODERMA救星小紅瓶🩷護膚恩物 立即按此參加👇
