李龍基提到未婚妻Chris時，不禁落淚。
李龍基將於2月25日在文化中心舉行《李龍基笑看人生演唱會2025》，他表示今次個唱的主題是大會希望他可以重新出發，「事實係有一排低沉啲，好多方面唔開心，咩都唔想做，唔想見人。依家唔係啦！你睇我精神煥發，全新一個李龍基，真係要重新出發！」他表示自己一向都是正面的人，坦言大家都見到他有一段時間不開心，形容那段時間是谷低，現在是谷低反彈。
李龍基表示2025年要重新出發。(娛樂組攝)
基哥表示現時在家中會自彈自唱，演唱會的準備進度亦非常好。提到有網民看見他練歌畫面是身在凌亂的屋企，他表示昔日未婚妻Chris王青霞在家時，不是那樣，現時「一支公係差啲」。他稱待Chris出獄之後，便會立即回大陸註冊，之後再申請她落來團聚，所以有信心屋企未來會整齊些。
然而，提到Chris是否得知他開騷時，基哥不禁老淚縱橫，哽咽說︰「當然……好開心……嗯……嗯……(有冇寫信俾你？)有嘅……以前每次開騷都有佢係我身邊，但呢次得我一個。得嘅！無問題！我搞得掂！況且身邊有好多好朋友話一定幫我，我唔需要太擔心。」他又提到Chris很愛聽他唱歌，「每次我係台上唱歌，佢就係台下眼甘甘望住我。佢有同我講上次做唔到唔緊要，呢次要努力，唔好辜負你嘅聽眾，所以今次我好俾心機做！」
問到有沒有挑戰一些歌曲是送給Chris，他提起《一生不變》時又再哽咽，眼泛淚光說︰「叫佢唔好擔心！我會一生不變！」再問到基哥跟Chris何時註冊，他表示要待她被遣返之後才去做手續，自己知道要去哪裡接她，對於在內地登記結婚要辦「寡佬證」，基哥表示知道，但不太心急辦理。他又稱因為今次經歷過人生低谷，所以感情會特別深，相信屆時感染力會更強。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
