Phil做了爸爸兩個多月，十分享受湊B過程，更自爆囝囝最愛對住自己大便。
林奕匡（Phil）接受程凱欣和麥卓華主持的《原來生活好快樂》訪問，Phil的太太李靄璣今年8月誕下兒子Darrien，剛榮升爸爸的Phil被兩位主持踢爆話題總是離不開兒子，是名副其實的「超級奶爸」。
Phil雖然只做了爸爸兩個多月，但他絕對是太太的「神隊友」，跟太太和岳母組成「湊B鐵三角」，每人負責一個更份照顧BB，「做爸爸乜都要識，例如點樣抱佢、餵奶、掃風，基本上我每件事都要識，因為做爸爸一定要畀佢有一個倚靠，可以照顧到佢。」
林奕匡接受程凱欣、麥卓華訪問。
Phil十分享受湊B過程，更自爆囝囝最愛對住自己大便，「BB要去便便嘅時候，唔知點解同我特別有緣，十次有八次都係同我有關。（你一湊佢就便便？）可能同我抱佢坐喺大髀有關，個位置太舒服，我又會幫佢搓吓肚仔。」
雖然要照顧兒子以致長期睡眠不足，Phil直言比預期中辛苦，但亦比預期中更加開心，「有咗小朋友之後，我每隔兩日就喊，因為太開心，最感動係佢係我個仔，佢係無價嘅，同埋佢每日都變緊，我真係唔想錯過佢任何一分每秒，因為佢兩日後嘅性格或者習慣又會唔同咗。」
林奕匡照顧兒子以致長期睡眠不足，Phil直言比預期中辛苦，但亦比預期中更加開心。
問Phil滿心滿眼都是兒子，會否擔心太太呷醋？他大爆：「佢有時都會呷醋，佢會話『BB咁，咁大BB呢』，佢都好辛苦，喺生小朋友過程中佢最辛苦，所以我每日都要提醒自己要去稱讚佢，因為佢有時會責怪自己有乜做得唔夠，我都會同佢講已經做得好好，等佢唔好咁大壓力。」
Phil滿心滿眼都是兒子，就連老婆都呷醋。
amJetso 送BIODERMA救星小紅瓶🩷護膚恩物 立即按此參加👇
