2022-08-20 23:04:57

林家謙演唱會｜陳奕迅任嘉賓眼鏡Look示人自稱「陳家謙」

林家謙6場紅館騷《SUMMER BLUES》今晚舉行第二場，繼首場請來張敬軒、JW等嘉賓現身後，今晚第二場先有林欣彤擔任首位嘉賓，唱出《懸崖花》及《林中鳥》，Mag表示出場前在台下聽到《下一位前度》時已經爆喊，很戥林家謙可以踏上紅館舞台高興。

至於身為固定嘉賓的Serrini，今晚換上黑色緊身裙登場，笑言首場穿黃裙被家謙指似燒賣，所以第二要換造型。今晚，林家謙更邀得歌神級陳奕迅（Eason）驚喜站台，早在林家謙未做幕前，他已跟Eason結緣，是次兩人終有機會同台演出，Eason甫出場即獲全場熱烈歡呼，他一邊唱一邊用手緊握林家謙，之後跟觀眾打招呼，自封「陳家謙」，自言專登以眼鏡Look示人。Eason又稱好感動，剛才等出場時差少少被搞喊。

即睇陳奕迅眼鏡look自稱「陳家謙」：

Eason家謙合唱《致明日的舞》

此外，Eason亦好多謝林家謙邀請，指好多個月前收到邀請已好想答應，好恨可以合作，又大讚家謙幾靚仔，「林家謙係一個好值得大家錫嘅人，單係佢音樂已經散播緊一種治癒。我第一次聽你係《下一位前度》，尤其是塞車嗰陣聽，真係可以降燥。」由於家謙一直冇咩出聲，所以Eason又笑話，「我知你係怕羞草....」家謙反駁「唔係呀！我唔覺得係.....」Eason續說「我知呀，你個心底裡面都賤賤地....」全場大笑歡呼，「我哋大家都係St.Jo仔(聖約瑟小學)，係咁上下，少少百厭囉！」

兩人合唱《致明日的舞》後，家謙自言因太緊張唱得麻麻，沒料到Eason即鼓勵他，「你想點呀？live 嘛！係咁㗎喎！你已經做得好好啦！第一次做喎！六場喎阿哥！我第一次都係四場咋！會愈來愈好，唔駛擔心！」觀眾立時歡呼聲又再四起，Eason建議即興唱多次，兩人又再重唱多一次《致明日的舞》。其後Eason叫家謙坐下，示意有禮物送給他，家謙非常驚訝，Eason表示：「佢真係唔知！以下呢首歌！我送俾你，送埋比現場大家！」然後他唱出《今日》，全場大合唱，令林家謙感動落淚。老婆徐濠縈今晚都有捧場。

林欣彤為林家謙紅館個唱第二場擔任嘉賓

C AllStar現身三缺一

除了林欣彤和陳奕迅之外，C AllStar亦有為今晚林家謙演唱會擔任嘉賓，然而何建曦(SoulJase)未有現身，只能三缺一上台。他們唱出由林家謙創作的《沒明日的恐懼》，由家謙彈鋼琴伴奏之餘亦有合唱。之後四人再合唱《留下來的人》。席間，釗峰被安仔踢爆在後台一度落淚，安仔又在台上撫摸林家謙的胸肌及手臂，乘機抽水。