近排好多報道提到，唔少台灣同香港人被「賣豬仔」騙到東南亞國家，被不法分子禁錮，兼要做電話騙案騙徒，每日打17個鐘頭電話！
電騙都係一種罪行，而犯罪元素正正係電影題材。2017年嘅合拍電影《猜猜我是誰》（內地片名《鉅額來電》）就係以電騙做主題，部份情節而家睇返都可以話係神預測。
故事以內地真實電騙案取材，民警丁小田（陳學冬飾）中學老師因為受騙而跳樓，小田誓要追尋真相，與警方電信詐騙專案組不謀而合。詐騙集團頭目林阿海（張孝全飾）與阿芳（桂綸鎂飾）在國內以正規招聘名義招募團員，到泰國後進行嚴格控制。通過先進的科技手段和對受害人心理的準確拿捏，兩人的詐騙集團日益強大，上至上市公司老闆，下至退休老人，財產都遭受威脅。專案組已經派出女特警小兔（蔣夢婕飾），混入泰國的電騙團隊蒐集證據，丁小田與小兔密切配合，逐步掌握了犯罪集團各個詐騙環節上的機密與證據，但同時阿海也與台灣幫立下30天騙下1億人民幣驚天賭約……
片中桂綸鎂管理嘅電騙集團，要各個到達泰國開工嘅成員交出電話同護照，並且有晒劇本同埋被洩露嘅個人資料，要負責打電話嘅成員根據2份材料嚟呃人，桂綸鎂仲會教埋用咩語氣同受害人講嘢！《猜猜我是誰》同樣描述有人發現工作同出發時嘅介紹不符而想離開，結果被暴打一輪仲威脅要賠錢，桂綸鎂仲話「打死丟落海餵魚」，十足而家新聞所講嘅情況！
想走，真係會被人打
《猜猜我是誰》係由香港導演彭順執導，由於出品方包括中央電視台電影頻道，相信係有官方宣導反詐騙訊息嘅使命在身。《猜》嚴格嚟講可以稱為電視電影，不過以官宣片計套戲唔算難睇，起碼敘事節奏都有刺激性，某啲鏡頭同色調都見到彭順風格，只係尾段追捕戲又變得太俗套。反而喺香港拍嘅結尾值得一讚，桂綸鎂嘅演出堪稱「由頭帶到尾」。
受害人現身說法
片尾出credit時候仲有一班受害人現身說法，講出當年受騙原因，例如有人以為畀6000蚊稅金就可以收到20萬「獎金」。當你想恥笑嘅時候，其中一位受害人講出受騙嘅根本癥結︰冇好好溝通。如果我地問多一下去東南亞嘅朋友同家人，佢地係去做啲乜，而家會唔會少好多家庭要面對呢類困境？
amJetso 送BIODERMA救星小紅瓶🩷護膚恩物 立即按此參加👇
