加拿大聲樂老師Rozette講評《歌手2024》爆紅 再評楊丞琳問「她的主業是演員？」
內地綜藝《歌手2024》開播不久即成話題，因為今季標榜直播真唱唔調聲，參與歌手歌藝高低無所遁形，其中演唱自己作品《帶我走》嘅楊丞琳(Rainie)，就因為被指高音位走音備受討論。有網媒搵加拿大聲樂老師Rozette講評《歌手2024》演出者表現，指出楊丞琳有「夾聲」嘅習慣，唱法似Britney Spears，而且會喺部份演繹間加入「H音」，唔少網民都讚Rozette講出重點。
「唔係樣樣都擅長架？」
楊丞琳喺《歌手2024》第2集唱完林俊傑《不為誰而唱的歌》就被淘汰，而Rozette亦推出新講評片討論Rainie演出。開頭Rozette覺得楊丞琳「夾聲」情況有改善，點知再聽多2個音就「故態復萌」。Rozette亦都問鏡頭後工作人員楊丞琳「她的主業是演員？」，工作人員就解釋亞洲好多藝人都係開始有名氣就要跨界別工作，Rozette就反問「唔係樣樣都擅長架？」。
雖則楊丞琳呢集被foul，但Rozette對佢嘅評價尚算正面，認為比前一次演出好，而且評價Rainie有一定基本功，聽到後段楊丞琳用真聲演唱就更加舉手讚好。
拍過唔少華語歌手講評片段
Rozette評價《歌手2024》以外，呢一年幾佢同團隊亦拍過唔少華語歌手講評片段，睇到陶喆20年前後嘅演出分別更感慨落淚。Rozette亦點評過已故天后李玟4年前喺《歌手》演繹I Will Survive嘅演出，盛讚開場嘅編排係佢聽過最複雜嘅版本，而Coco唱跳演出都冇喘氣更令Rozette相當佩服。即使Rozette唔識中文，但仍然講出歌手發音嘅狀況，甚至聽一次就模仿到，令網友讚嘆不已。
來自加拿大嘅Rozette原名Jenn Beaupre，既係歌手亦係聲樂指導，佢嘅講評片有大量歌唱技巧分享，一針見血但又唔尖酸刻薄，評價《歌手2024》嘅片段瘋傳令佢喺兩岸三地爆紅。而Rozette亦有分享自己嘅唱歌片段，一曲Listen盡見功架，好犀利！
原文刊登於 Yahoo 娛樂圈
鐵質食物｜（am730製圖）
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
