喺呢個每月都有幾部reboot或續集電影上畫嘅零創意電影世代，對於「經典」，影迷都覺得只能遠觀而不可褻玩焉，否則如同自插一刀，摧毀神片地位。話說上個月我收到邀請，有得睇期待已久、96年神片《迷幻列車》續集，而到咗睇片前一晚，我第一次患上睇戲前緊張症候群(當然睇咗review打底)。一部顛覆九十年代英國電影嘅神片，可以點樣拍出神作2.0？結果，睇完步出戲院嘅感想係……丹尼波爾，你係有啲計嘅。
文：Wing
神一般的「角色」
主角青頭、巴閉、色仔及薯嘜係《迷》片最重要嘅「資產」，兩集均由伊雲麥葵格、羅拔卡萊爾、尊尼李米勒及伊雲班納分別飾演。除咗「巴閉」羅拔卡萊爾之外，當年幾個主角都只有廿幾歲，將廢青角色發揮得淋漓盡致，相信大家都好關心，21年來佢哋經歷咗啲咩。丹尼波爾今集一開始，先簡單交代各人現況：大佬巴閉坐緊監；青頭喺上集結尾夾帶私逃後，離開咗蘇格蘭，今集將會重返舊地；而仍然留守蘇格蘭嘅色仔，雖然嬲爆青頭出賣兄弟，但兩人今集仍然拍住上「做世界」；而薯嘜就犀利啦！伊雲班納將薯嘜當年神態神還原，雖然依然係邊青、道友，但將會有意所不到嘅勇猛表現。至於青頭女神戴安娜，嘻嘻，咁重要嘅配角，點會唔現身啊？
神一般的「劇本」
《迷》片續集等了又等，21年後終於登場，但等嘅唔止粉絲，連導演都等咗十幾年。查實《迷》片續集，自首集推出後一直有傳開拍，但至06年時，導演仍然覺得幾個主角保養太好，外貌變化不大，最終20年後先開拍。當年嘅《迷》片改編自同名小說，由Irvine Welsh創作，而佢本人當年亦有參演一角，就係片中毒販米奇，當然佢今集都會現身；今集劇本，同樣由佢同編劇約翰霍奇合作編寫，除咗延續首集劇情之外，同時亦融合咗Irvine另一本小說《Porno》，將會揭開上集青頭夾帶私逃後衍生嘅兄弟情仇，更會交代廢青受時代洗禮後，如何面對人生。
神一般的「場景」
相信大家都知道，雖然上集場景設定係蘇格蘭愛丁堡，但礙於21年前只有200萬英鎊budget，所以好多戲份都喺格拉斯哥取景。今集budget多咗，大部分戲份都喺番愛丁堡拍攝，而首集最具標誌性嘅Corrour railway station大草地(上集青頭同色仔開氣槍射狗狗屁股嗰度)，今集當然會重現，至於上集多個經典場景及擺設，例如酒吧、波枱、青頭睡房及「the worst toilet in scotland」(上圖)等會唔會出現？自己入場睇啦。
《迷幻列車》梗係唔止演員、劇本及場景夠神，當年超強嘅Underworld配樂、別具一格嘅剪接，仲有攝影、美指及服裝設計……統統都係經典，雖然大部分幕後班底已經換人，但丹尼波爾為感謝當年班底，今集將會向佢哋致敬，重塑21年前作品氛圍。
《迷幻列車2》上映日期：即日
入App免費換走健康產品
