蒲茜兒Serena缺席Cookies重聚近況曝光 移居加拿大單親照顧女兒
鄧麗欣（Stephy）首次紅館個唱於周日晚完成，尾場彩蛋係Stephy同Cookies隊友吳雨霏（Kary）、馬思恆（Helena）、陳素瑩（Gloria）、區文詩（Angela）、楊愛瑾（Miki）及何綺玲（Elaine）一夜重組，令唔少網民同觀眾超級激動。9位Cookies成員獨欠傅穎Theresa及蒲茜兒Serena未有蒲頭，「主人家」鄧麗欣強調有作出邀請，「全部都有！一定有問！但真係冇辦法強求大家嘅時間真係夾到，大家有自己忙碌嘅嘢」。
蒲茜兒近年轉行做網路業務顧問
向來被指同其他隊友關係麻麻嘅傅穎近年喺內地發展，不時開直播。而另一缺席成員蒲茜兒Serena就已經離開娛圈多年。當年Cookies「9變4」時被淘汰嘅Serena，一度有少量娛圈工作，但後來正式淡出，並於2010年結婚及移居加拿大，婚後育有一對女兒。可惜Serena喺2022年宣布離婚，言辭間曾表示難過。曾經於醫護行業工作嘅蒲茜兒近年轉行做網路業務顧問，不時喺IG分享創業生得同生活日常。有報道估計，蒲茜兒可能忙於照顧女兒及工作而未能回港。
相片可見蒲茜兒而家架起眼鏡，一副媽媽模樣，帖文中提到同家人相處嘅點滴。不過Serena嘅帖文以至網站都未有提及佢做緊嘅網路營銷生意係賣緊咩，有少少神秘。
原文刊登於 Yahoo 娛樂圈
立即更新/下載AM730手機APP 體驗升級功能
