雷有輝(Patrick)接受娛樂節目訪問，談到舉行個人演唱會感受。他說：「今次算係第一次舉行大型嘅售票音樂會，自己戒煙5年，可以話百利而無一害，體能、外表、皮膚同精神都好咗，食嘢仲好味咗，搞到更加為食，初初戒煙肥咗成10磅，因為食到啲真味道。(對唱歌方面係咪好咗？)唱歌時舒服咗好多，抖氣感覺同之前差好遠，依家大力吸一口氣唔會有阻滯，𣈱順好多，唔會唱唱下咳。」
一直有擔任和音工作的雷有輝，被問到做和音及Solo歌手的分別時，他說：「兩者感覺好唔同，不過兩樣都好享受，以前都曾經有試音機會，亦有同其他歌手推出雜錦唱片，不過最終婉拒咗Paco黃柏高。」Patrick又說：「其實我因為哥哥雷有曜先接觸和音，讀書時，有次佢病咗，我代佢去錄和音，當時我唔識睇譜，仲叫幫我錄音嘅周啓生唱一次俾我聽，好彩首歌容易記，又俾我過到關，自此就開始我做和音嘅生捱，嗰首係《播音人》主題曲，甄妮嘅《愛定你一個》。」
amJetso 送BIODERMA救星小紅瓶🩷護膚恩物 立即按此參加👇
