![香港小姐2024|第二批佳麗秦冀雯盧凱怡鍾翠詩出發塞班島 馮盈盈Mayanne泳裝上陣親親魔鬼魚](https://cdn.am730.com.hk/s3fs-public/styles/article_image/public/2024-07/%E6%B8%AF%E5%A7%9020%20%2817%29.jpg?itok=E7tfZf2e)
《2024香港小姐競選》第二批候選佳麗秦冀雯、盧凱怡、鍾翠詩已出發到塞班島。
《2024香港小姐競選》的15強外景拍攝已經陸續展開,第二批候選佳麗7號秦冀雯(Yvonne)、8號盧凱怡(Kerry)、12號鍾翠詩(Tracy)日前已出發到塞班島,並由兩位師姐馮盈盈及麥美恩(Mayanne)帶領為外景開工。三位佳麗昨日(22日)行程非常豐富,一大清早便出發沙灘拍攝泳裝鏡頭,之後在兩位師姐陪同下,齊齊與魔鬼魚作零距離接觸。以水着上陣的三位佳麗大曬健美身材,與魔鬼魚抱抱兼餵食,玩得不亦樂乎。兩位師姐亦有落場玩埋一份,Mayanne全程表現勁騰雞,拍攝期間有一條魔鬼魚在其腳邊游過,Mayanne即時嚇破膽露出痛苦表情,場面搞笑。有指親親魔鬼魚會幸運7年,三位佳麗和盈盈聽畢都爭住錫,而細膽的Mayanne為了Good Luck最終亦鼓起勇氣錫錫魔鬼魚。
![鍾翠詩、秦冀雯、盧凱怡近距離接觸魔鬼魚,馮盈盈、Mayanne都有玩埋一份。](https://cdn.am730.com.hk/s3fs-public/styles/article_image/public/2024-07/0a884f80-c61c-4623-952f-874b316c9cf8_0.jpg?itok=RLDj_48u)
鍾翠詩、秦冀雯、盧凱怡近距離接觸魔鬼魚,馮盈盈、Mayanne都有玩埋一份。
根據口味自選喜歡菜式
馮盈盈、Mayanne與三位師妹共進午餐期間亦發生搞笑事,事緣三位佳麗根據自己口味選擇了喜歡菜式,口味比較獨特的Yvonne竟揀選了苦瓜全餐,就連飲品都是苦瓜汁。之後因為製作組安排,兩位師姐需根據對三位師妹的第一印象為三人分配菜式,結果Kerry被安排品嚐苦瓜全餐,雖然「苦過弟弟」,但 Kerry仍一邊吃一邊露出甜美笑容,相當專業。三位佳麗與盈盈、Mayanne一同受訪,講到是次拍攝泳裝事前有否做好準備?Kerry說:「我哋從參選開始一直都有Keep fit,每個人都好勤力,我發現Tracy同Yvonne都食得少過我。」盈盈聞言大爆Yvonne非常自律,就連飛機餐都親自準備,Yvonne笑言:「我好聽話㗎,大家都叫我減吓肥,因為上鏡會好睇啲。」Tracy則指不擔心拍泳裝鏡頭:「但我都會食少啲,因為怕有肚腩。」
Mayanne穿着媽媽泳裝
至於師姐級的Mayanne則搞笑說:「咁想睇我哋着泳裝咩?有咩好睇,十幾年前咪着過囉!」盈盈笑言:「都有做啲準備,但全部(泳衣)都係好運動型,唔會 走光,好安全。」Mayanne聞言再搞Gag謂:「我帶咗我媽套泳衣嚟,簡稱面堅尼,由頭遮到尾,美白好緊要呀!」講到Mayanne和Tracy同樣來自溫哥華,問到有否經驗分享給師妹?Mayanne說:「其實我已經變咗一個港女,你(Tracy) Feel唔Feel到我仲有溫哥華特質?」Tracy聞言明明想向師姐笠高帽,但卻被其餘四人誤解為爆Mayanne多嘴,場面搞笑;Tracy其實是這樣說的:「有(溫哥華特質)呀,就係好多嘢講,可以有好多話題,呢樣好好。」