![馮允謙將於10月到紅館開騷。](https://cdn.am730.com.hk/s3fs-public/styles/article_image/public/2024-07/ENT_74.jpg?itok=H8utl-TO)
馮允謙將於10月到紅館開騷。
馮允謙(Jay Fung)日前到新城廣播接受黎莉主持的《勁爆樂勢力》錄音訪問,宣傳新歌《在愛面前投降》,抱恙的Jay戴住口罩現身,他無奈表示:「條氣唔係好順,可能係敏感,又或者天氣太熱,一開聲就咳。」
節目甫開始,Jay一臉興奮公布將於今年10月再次登上紅館舉行演唱會,他指去年尾已得悉今年會開個唱,所以當時已開始做定新歌,並計劃今年推出大碟,不過Jay坦言有一定壓力,「壓力都係來自自己,每次開騷都會好珍惜,都想做啲未做過嘅事,我哋都儲咗好多『彈藥』,寫咗9首歌,再睇吓派邊首先。」
![馮允謙去年尾已得悉今年會開個唱,所以當時已開始做定新歌。](https://cdn.am730.com.hk/s3fs-public/styles/article_image/public/2024-07/450251275_18445044610031562_2484903832104416307_n.jpg?itok=bcAMyQXX)
馮允謙去年尾已得悉今年會開個唱,所以當時已開始做定新歌。
提到新歌《在愛面前投降》,Jay亦大談他的愛情觀,「細個覺得愛情係一種感覺,但好多時都好易散(分手),雖然愛情好複雜,但有時唔係純粹個感覺,係一個承諾。」Jay坦言愛情對他來說十分重要,但無論是另一半或家人,總會有意見不合或爭執的時候,「好似我同女朋友一齊都好長時間,耐咗一定有拗撬,但點樣去保持關係,有時真係要讓步,讓步嗰刻你可能覺得係輸,但你仍然同呢個人一齊,其實都係贏咗。」
![馮允謙日前到新城廣播接受黎莉主持的《勁爆樂勢力》錄音訪問。](https://cdn.am730.com.hk/s3fs-public/styles/article_image/public/2024-07/2.%20%E9%A6%AE%E5%85%81%E8%AC%99%E3%80%81%E9%BB%8E%E8%8E%89.jpg?itok=CdOu_JvV)
馮允謙日前到新城廣播接受黎莉主持的《勁爆樂勢力》錄音訪問。
至於新歌MV方面,Jay今次請來一男一女擔任主角,他則飾演一個隱形旁觀者,「故事講世界末日,我係生還者,入咗間屋見證呢對愛情故事,當中要我跨欄有啲難,因為條褲好緊,對鞋又重,仲要30幾度全程着住皮褸;個MV最感動到我係求婚嗰幕,我喺到幻想如果係我會點,啲眼淚就出晒嚟,同事話我演技好咗,我話唔係演,係真眼淚。」