高鈞賢14年離巢TVB北上發展後，又與朋友合資居酒屋生意，至2020年與邵氏簽5年部頭約，中港兩邊走。高鈞賢不時於社交平台分享近況，最近佢就喺小紅書以「香港 Roomtour 歡迎光臨 兩貓一人TVB演員的家」為題上傳一段Home Tour影片；但就被網民透過蛛絲馬跡踢爆片中並唔係高鈞賢香港嘅屋企。
從影片所見，高鈞賢屋企裝潢甚有格調，間隔非常寬敞，客廳位置放咗唔少珍藏公仔和擺設；高鈞賢表示共有4間房，但自己太鍾意買嘢所以已塞爆咗3間房，其中一間為擺滿T-shirt、衛衣及波鞋嘅衣帽間：「今天帶你們參觀我家！是不是還挺溫馨的？除了能讓我拍戲之餘好好放鬆休息，這個家的功能就是收納我買來的寶貝們了，這次先公開我的衣帽間，下次再繼續給你們分享我的穿搭經驗！」
家中有兩腳插
有內地網民就質疑高鈞賢影片所呈現嘅並非香港嘅屋企，而係內地嘅住所：「這好像廣東樓盤結構風格」、「就是廣州房子」、「我家的格局跟他的一樣」、「這是在廣州啊…而且是同居他女朋友的房子…怎麼變成『香港自己的房子』了」等等；又有網民發現屋內嘅插頭係兩腳插，而唔係香港嘅三腳插。對於事件，高鈞賢暫未有回應，但一班網民已認定高鈞賢係講大話，紛紛留言：「好Seven」、「香港用淘寶插座唔得咩，不過香港唔會無啦啦幅牆有個水龍頭」等等。
原文刊登於 Yahoo 娛樂圈
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
