Ray Online｜Oasis世紀重組　田北辰：楊潤雄快些找電話爭取在港辦演唱會

英國殿堂級搖滾樂隊Oasis宣布世紀重組，會舉辦巡迴演唱會。實政圓桌立法會議員田北辰，叫文化體育及旅遊局局長楊潤雄快啲搵人哋電話，爭取嚟香港舉辦演唱會。

香港啟德體育園下年第一季開幕，社會有討論應該搞咩活動打響頭炮。田北辰今日喺社交網站發文提到，上星期國際樂壇最重磅消息就係Oasis宣布重組，聽講完成英國巡迴演唱會之後，下年有機會去其他地方繼續舉辦演唱會。佢提到Oasis過百萬張門票賣到死哂機，如果爭取到嚟香港啟德體育園舉辦10場演唱會，以香港喺亞洲嘅優越位置，中印日韓東南亞都咁方便，50萬張飛應該唔難賣。

促楊潤雄找電話爭取在港辦演唱會

今年頭香港錯過爭取另一國際巨星Taylor Swift舉辦演唱會，楊潤雄嗰陣話會積極爭取國際知名歌手嚟香港表演，但係「世界級嘅(巨星)，我連佢電話都未必搵到」。田北辰重提事件，話而家仲有咁多時間，係咪應該諗吓開始同人哋接觸，慢慢傾吓意向或者條件。佢希望楊潤雄快啲起而行之，搵咗人哋電話先啦！