Quince(後排左一)、余秀珠(後排中)同黃耀塱一齊用電腦探索「中電元宇宙」。(中電提供)
科技已經成為呢個年代教與學不可或缺嘅一環，但就唔係每名學生同屋企都負擔得起一部電腦。中電企業發展總裁莊偉茵(Quince)最近就聯同數碼總裁貝柏安同一班中電義工，將40部二手手提電腦經香港單親協會，轉送畀一班基層學童。
中電第三年捐二手電腦
Quince形容「 工欲善其事，必先利其器，認為活動喺賦予二手電腦「新生命」之餘，亦可以幫到一班基層同學成為數碼公民。佢仲特別提醒同學仔一定要注意網絡安全、好好保護個人資料同提防網絡騙子。同時，中電數碼團隊更即場教同學熟習電腦基本運作、介紹有用網絡安全知識同善用網上資源等。
今次已經係中電第三年捐二手電腦，香港單親協會總幹事余秀珠(Jessie)就話好感謝中電支持，又大讚中電數碼團隊清咗電腦舊資料之餘，仲安裝咗一啲簡單、實用嘅應用程式，等學生可以即刻用。受惠嘅同學仔黃耀塱話以前要借學校嘅平板電腦用，唔方便又多限制，依家有自己電腦除咗做功課仲可以上網自學有興趣嘅嘢，感到好開心。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
