![Ray Online|何敬康投入舉重7年因傷暫停比賽 呼籲支持港隊](https://cdn.am730.com.hk/s3fs-public/styles/article_image/public/2024-07/%E8%9E%A2%E5%B9%95%E6%93%B7%E5%8F%96%E7%95%AB%E9%9D%A2%202024-07-24%20175714.png?itok=mIwWPsNs)
Ray Online|何敬康投入舉重7年因傷暫停比賽 呼籲支持港隊
巴黎奧運即將揭幕,新民黨立法會議員何敬康喺社交網站分享影片,原來佢投入舉重已經7年,可惜上年膊頭受傷要暫停訓練。佢話見到世界級運動員喺唔同傷患下訓練,佢更加冇放棄嘅理由,同時呼籲大家為港隊運動員打氣。
影片中見到何敬康揮灑汗水,努力舉重嘅片段。佢話從小熱愛運動,本身玩混合健身,但發現太多範疇冇樣精,決定將精力同專注力放喺舉重。佢一直有參加比賽,因為作為運動員,訓練嗰陣一定要有目標,喺比賽中奪取佳績,正正係訓練嘅目標,佢亦好享受比賽嘅感覺。佢希望今年訓練達標,可以重新參加比賽。
爭取政府加強支援運動員
作為運動員,何敬康話「小小運動員如我」,都需要屋企人、朋友、同事支持。港隊運動員更加需要全香港市民支持,佢亦會爭取政府多啲支援運動員,令佢哋可以全心全意投入訓練,為港隊出力。