Ray Online｜劉智鵬倡劃分「東西南北」區域引入新暴雨機制 政府指會更複雜
今年夏天，香港接連經歷極端天氣。立法會今日討論改善天氣預報工作，議員劉智鵬話，雖然香港地方細，但有時市區雨量達到紅雨甚至黑雨，而新界仍然喺到曬太陽，佢建議引入新嘅暴雨機制，將「南北」分成兩區，「東西」又分成兩區，覺得會更加準確。
不過，環境及生態局局長謝展寰回應話，而家天文台已經有分區雨量資訊，市民可以喺天文台網站即時收睇。佢覺得如果按劉智鵬嘅建議，為唔同地區制定唔同嘅暴雨訊號，對市民、學校同交通工具安排都會更加複雜。謝展寰舉例話例如荃灣區雨量達到黑雨水平，其他地區只係紅雨，但師生以至打工仔未必住喺荃灣區，可能係跨區。
政府指天文台預報較民間組織好
另外，立法會議員廖長江提到有唔少民間氣象組織，成日分享氣象資訊同埋做颱風直播，問局方會唔會考慮交流合作。謝展寰就話好多對氣象有興趣嘅民間網站或者市民，不時同天文台交流，嘗試用唔同方式預報天氣，不過謝展寰總結整體而言都係天文台預報比較優勝喎。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
