曾俊華(右)同太太去咗海洋公園睇大熊貓安安。(曾俊華FB)
大熊貓安安和可可今日首次喺海洋公園與公眾見面。前財政司司長曾俊華話，香港依家擁有6隻大熊貓，確實係有唔少吸引力，但指出內地唔少城市都同樣有大熊貓，單係廣州長隆野生動物園就有16隻，直言大熊貓雖然係香港其中一個吸客元素，但好難單靠佢哋就可以搞旺旅遊業，遑論出現「熊貓經濟」。
▼安安和可可今日正式與公眾見面▼
提到身邊有幾對熟齡離婚朋友
曾俊華喺社交網站提到，自己前日都去咗海洋公園見安安同可可，形容見到佢哋咁可愛心都軟埋，又話雄性嘅安安成個大爺咁豪邁𡁻竹筍，雌性嘅「可可」就斯文到極食竹，非常有趣。至於啱啱滿百日嘅一對大熊貓「家姐」同「弟弟」，曾俊華就睇咗最新嘅片段，話見到佢哋健康成長，好希望可以早日同佢哋見面。
另外，曾俊華又提到身邊有幾對熟齡離婚朋友，話有研究顯示美國進行緊離婚手續嘅人，有三成六都係50歲以上嘅人。人類壽命愈嚟愈長，佢話仔大女大之後可能仲有廿年人生，人生嘅優先次序亦由「子女」變成「自己」，仲話點解唔學某前知名人士話齋「踏上人生另一階段，海闊天空」，唔點名咁引用前文化體育及旅遊局局長楊潤雄嘅離職感言喎。
立即更新/下載AM730手機APP 體驗升級功能
