2024-11-19 18:19:58

Ray Online｜尚海龍申請提出急切質詢討論珠海及江蘇傷人　被梁君彥駁回

珠海近日發生越野車撞死35人事件，而江蘇「無錫工藝職業技術學院」就發生無差別斬人案。香港嘅立法會議員都好關注事件，尚海龍申請喺聽日嘅立法會大會提出急切質詢討論事件，不過就畀立法會主席梁君彥駁回。

尚海龍話收到香港市民表示不安，仲關心政府喺預防呢類「黑天鵝事件」嘅安排，以提高市民嘅安全感。佢申請提出急切質詢，問政府有冇就事前冇徵兆、突發而且惡意傷害嘅事件制定預案措施，同埋想問未來計劃。

梁君彥駁回申請

立法會主席梁君彥對上述事件導致多人不幸死亡同受傷，覺得好難過，亦理解公眾好關注事件。不過，根據《議事規則》，急切質詢要符合「性質急切」同埋「與公眾有重大關係」嘅條件。梁君彥覺得唔係急切到一定要喺聽日嘅大會提出，就算喺之後嘅立法會會議上提出，都唔會失去意義。佢建議尚海龍考慮循其他渠道，例如提出口頭質詢或者喺相關事務委員會跟進事件。