Ray Online｜工聯會橫額「成功爭取加設垃圾桶」惹熱議　解釋或微不足道但屬長期工作成果

街頭時不時都有區議員橫額，同街坊匯報工作。最近工聯會區議員喺將軍澳尚德天橋掛橫額，寫住「成功爭取尚德天橋加設垃圾桶」，引起網民熱議。工聯會西貢區議員黃遠康解釋，對部分市民嚟講加設1個垃圾桶可能係微不足道，但經過佢哋多年嚟爭取，其實係長期嘅工作成果。

《am730》記者向黃遠康查詢，佢解釋尚德天橋開通5年，一直以嚟有好多居民希望加設垃圾桶。不過呢5年期間，先遇到社會運動，政府擔心有人利用垃圾桶做破壞；之後又遇到新冠疫情；加埋政府原本推行垃圾徵費，唔希望喺街上放太多垃圾桶，種種原因都令到唔成事。而近日終於按居民需求加設垃圾桶，所以即刻同大家匯報工作，望落微不足道嘅垃圾桶其實係長期嘅工作成果。

多謝網民幫忙宣傳

有網民戲稱呢件事堪稱近年區內最亮麗嘅「成功爭取」。黃遠康話留意到唔同網民嘅意見，多謝佢哋嘅評價同埋幫手宣傳。另外，有網民話天橋本身冇垃圾，放咗垃圾桶之後，成個桶裝滿垃圾，令到側邊成地都係垃圾。黃遠康話會繼續跟進，因為天橋只係180米長，暫時覺得1個垃圾桶就夠，唔需要加多幾個，希望有關方面加密清潔。